Tin mayor ku nunka no a tende di plaka adishonal – potrèt: Elisa Koek
WILLEMSTAD – Pobresa hopi bia ta un palabra relativo, pero un mucha sin kuminda mesora ta pinta un imágen kla. Na Kòrsou tin mucha ku no tin kuminda. Na e akohida pafó di skol Boso Kosecha tin di nan ta haña akohida: nan ta haña kuminda i nan ta sera konosí ku e ‘otro banda’ di bida sin pobresa.
For di 2016 mayor na islanan BES ta haña kompensashon pa yu. Na Kòrsou tin plaka adishonal pa yu, un suma anual ku por kita di belasting riba entrada. Un hende mester tin e entrada ei si.
“Ta kalkulá e plaka adishonal pa yu ora determiná e belasting riba entrada tur aña”, Joop van Solingen di servisio di belasting ta konta. Ta kalkulá un hende su entrada, ta kita un ke otro, manera un hipotek òf fiansa i loke sobra ta e entrada ku mester paga belasting riba dje. Via e sistema di belasting, dependiente di e entrada, ta kobra belasting. Di e suma ei por kita e plaka adishonal pa yu.
Èkstra
E plaka adishonal pa yu ta dependé di e edat i e situashon di e yu (bibá na kas, ta bai skol) i e situashon di e mayor (soltero/kasá). E suma por subi te 727 florin pa aña. “Esaki por ta un nèchi suma pa e mayornan”, Mirjam Adamus di Boso Kosecha ta bisa. “Ku e plaka ei kisas nan por kumpra nèt un kos importante pa nan yu.”
Boso Kosecha dies aña pasá a kuminsá ku akohida di mucha. Despues di skol nan ta duna akohida na mucha di bario pober. “Nos ta tende di e muchanan via di skol, Ban Bario Bèk i voogdijraad. E relatonan ku nos ta tende, kasi nos no por kere. Awe mes a bini dos mucha ku no a bai skol pasobra no tabatin plaka pa bùs. Nan no a kome nada tampoko.”
Kortesia
Ounke e situashon di e muchanan hopi bia ta pèrtá mayoria ta drenta e bùs di Boso Kosecha kontentu. Nan ta kumindá otro i nan ‘tio’ i ‘tanta’ Erwin i Miriam. Ora tin hende ku nan no konosé mesora nan ta duna man nèchi sera konosí. Na kaminda Erwin Adamus tin be ta kòrda e muchanan pa sinta règt. “Prinsesa ta sinta règt ke men abo tambe tòg?”e ta puntra un di e muchanan. E ta koregí su mes mesora i e otro muchanan ta hasi meskos. Nos ta siña nan for di kuminsamentu pa tin bon manera: pa kumindá, kome nèchi i sinta règt. Esakinan ta kos ku lo yuda nan henter nan bida, pero ku hopi bia nan no ta haña na kas.”
Tristu
Hopi bia e muchanan ta yega na Boso Kosecha ku hamber òf ku paña kibrá. Cordela, mama di tres yu, ta konta ku e ta biba di un dia pa otro. “Tur dia mi ta wak kiko mi por kumpra. Tin bia nos tin gana di kome fruta fresku òf karni ma esei no por tur ora.” Nunka e no a tende di e plaka adishonal pa yu, pero e no tin trabou tampoko ke men e no tin entrada pa belasting. Si mi por a haña plaka èkstra lo mi a kumpra espesialmente kos pa skol”, Cordela ta bisa. “Mi no por haña trabou ke men t’asina mester hasi numa. Mi ta mira futuro tristu, mi no ta pensa ariba masha.”
Outor Elisa Koek