Minister Ronald Plasterk, (man robes) ku promé minister William Marlin
PHILIPSBURG – Konseho di minister di Reino no por keda sin aster pronunsiashon di un komishon di disputa, solamente si tin un masha bon motibashon. E punto di bista ei minister Ronald Plasterk (Relashonnan den Reino) a anunsiá djamars atardi durante un konferensha di prensa na kabamentu di su bishita di trabou na Sint Maarten.
Aña pasá ainda Plasterk a bisa ku den konflikto entre e paisnan den reino semper ta Konseho di Minister di Reino tin último palabra.
Preferensha
Loke ainda ta pará entre Plasterk i e gobièrnunan na Sint Maarten, Aruba i Kòrsou ta e pregunta kua instituto mester haña e enkargo di ehekushon di e areglo di disputa. Plasterk ke pa Raad van State hasi esaki, e paisnan ta preferá Hoge Raad, pasobra esei ta para mas leu for di polírika.
Plasterk ta bisa ku e ta masha impreshoná pa minister Emil Lee (Salubridat Públiko) ku a dun’é un splikashon tokante e plannan pa un hòspital nobo. “E no ta pensa solamente riba e edifisio, sino riba e plan di empresa kompleto tambe.”
Plasterk su presensia tabata espesialmente pa sera konosí ku e miembronan di konseho di minister. EL a topa tambe ku presidente di parlamento Sarah Wescot-Williams i e dos vise-presidentenan George Pantophlet i Frans Richardson.
No tin deliberashon
Promé minister Willian Marlin a bisa ku no tabatin negoshashon òf diskushon pisá. A konkordá pa warda ku e Kámara di Integridat te ora bin e sentensia di Korte Konstitushonal. E presupuesto no tabata un punto di diskushon, pasobra a entregá e proposishon di e presupuesto promé ku e deadline di 31 di yanüari serka parlamento.
Tokante e sosten ku a primintí pa reforsá mantenshon di lei ainda no a hasi palabrashon konkreto, Marlin a bisa.
Outor Hilbert Haar