Personal di JICN ta kana den òptògt pa e edifisio prinsipal di RCN – potrèt: Janita Monna
KRALENDIJK – Personal di e Institushon Hudisial Karibe Hulandes (JICN) no ke pa direktor Patricia Hassel bai. Pa enfatisá e mensahe aki un setenta kolaboradó di e prizòn awe mèrdia a kana den òptògt bai e edifisio prinsipal di Rijksdienst Caribisch Nederland.
“Ta na radio nos a tende ayera ku e direktor mester bai”, Charel Janga, presidente di e konseho di partisipashon di e prizòn ta bisa. E rumor ta kore ku un hulandes lo sigui Hassel. Nos ke pa e keda.”
Karta
Ta p’esei mas o ménos setenta kolaboradó di JICN banda di ora di kome ta bini huntu serka e porta di prizòn. Nos ta bai entregá un karta na Jan Helmond, direktor di RCN. Señora Hassell último añanan a lanta e prizòn. E mester t’ei aworó tambe ora habrié, Janga ta haña. Un kolega ku ta kana dilanti den e rei di hende ta añadí: E konosé e kultura di e prezunan. E ta un people manager, un direktor envolví.
E edifisio di Rijksdienst ta mas o ménos sinku minüt kana for di e prizòn. Tambe kolaboradónan ku ta liber awe, ta djòin. Un otro parti mester keda paden, asina durante e marcha di protesta e seguridat ta garantisá.
Na man robes Charel Janga ta papia ku direktor di RCN – Jan Helmond – potrèt:
Intrankilidat
Ora yega na RCN Janga ta dirigí palabra na Helmond. E ta bolbe enfatisá ku e kolaboradónan di RCN ta “masha indigná” ku nan mester a tende un notisia asina grandi na radio. “Nos tin un konseho di partisipashon ku ta demokrátiko. No a informá nan di e desishon aki. Notisia manera esaki ta trese intrankilidat bou di personal, pero tambe bou di e prezunan. Nos ke pa retirá e desishon pa kita e direktor for di trabou.”
E prizòn na Boneiru tin rònt di shen trahadó, mas o ménos setenta di nan a firma e petishon ku Janga ta entregá awe na direktor Helmond di RCN. Serka e firmanan di personal tin un karta di un prezu tambe. Nan tampoko no ta trankil ku yegada di un direktor eventual ‘makamba’. Pasobra pa nan Hassel ta manera un mama : I niun hende no por kibra e laso entre mama i yu asinasina.
Un aplouso grandi ta zona ora Janga kaba di papia i entregá tur dos karta na Jan Helmond. Esaki no por reakshoná ku kontenido riba e kaso pero e ke bisa si ku Hassel ta kombersando ku Peter Hennephof, direktor mayó di Servisio di Institutonan Hudisial di e Ministerio di Seguridat i Hustisia., tokante otro trabou. E ministerio ta responsabel pa e nombramentu di un eventual direktor nobo.
Envolví
Helmond: “E echo ku boso ta aki ku tantu hende ta mustra ku boso ta envolví. Lo mi pasa esaki na esnan responsabel na Hustisia i mi ta spera un reakshon riba término korto.” Algu despues di mitar di un e akshon a pasa i e personal ta kana bai e prizòn bèk.
Outor Janita Monna