Sangura Aedis Aegypti òf sangura di dengue, ku banda di dengue ta plama chikungunya tambe – Potrèt: Wikipedia
DEN HAAG – No por bisa nada ainda ku siguransa tokante e viro di zika i e konsekuenshanan eventual. Esei ekspertonan riba enfermedat kontagioso a bisa tokante e viro di zika awe den Tweede Kamer durante un briefing tokante e viro di zika.
Durante e briefing a papia tokante e posibel relashonnan di e viro di zika i otro enfermedat. Tambe a papia di un kantidat di kaso di morto kaminda zika kisas a hunga un ròl. E parlamentarionan ker a sa tambe kon a reakshoná na Hulanda Karibense, i si e islanan ta prepará.
Anteriormente WHO a deklara estado di emergensia. Pero segun profesor Marion Koopmans, hefe di virologia na Erasmus Medisch Centrum esaki ta un estado di ta èkstra alerto kaminda investigashon mester trese klaridat. “Ke men: no tin drama, pero si ta importante pa haña sa lihé i bon ta kiko ta pasando.”
Kaso di morto na Sürnam
Na Sürnam siman pasá kuater hòmber lo a fayesé di e konsekuenshanan di zika. Koopmans: ”Fayesé ku zika òf di zika? Esei ta un diferensha masha importante ku nos no sa ku e datonan ku nos tin aworakí.”
E ta añadí ku pashènt ku síndrome di Guillain-Barré (GBS), un malesa di nervio, por muri si nan múskulonan di respirashon paralisá. Ta investigá e relashon entre zika i GBS, pero no ta sigur.
Katedrátiko Jaap van Dissel, direktor di e Sentro di kombatimentu di enfermedat kontagioso di Rijksinstituut voor Volksgezondheid en Milieu (RIVM): “Mi a papia ku e dòkternan ku ta tratando e pashèntnan. Den e artíkulo den korant tabatin muchu poko detaye pa bisa ku ta pashènt malu. Tur tabata pashènt ku mas problema médiko. Ounke bo no por ekskluí.”
Hulanda Karibense
Segun Rob Sardeman, manager di proyekto salubridat na Hulanda Karibense, Hulanda Karibense a prepará pa e viro di zika. “Riba tur isla tin un programa eksistente ku ta kontrolá. Nan ta wak ku tin kaminda pa sangura brui. A intensivá e aktividat aki.”
Agnes Wolbert (PvdA): “Kasi nunka bo no ta tende nada di muhé na estado, kon pueblo ta trata ku zika?” Van Dissel: “Tabatin hopi intrankilidat pa motibu di un retraso di informashon, esaki a bira ménos. Hendenan ta reakshoná basta trankil.”
Organisashonnan di biahe
E organisashonnan hulandes di biahe ku ta aktivo den Karibe ta reakshoná resigná. Petra Kok, bosero di TUI: Zika no ta masha dañino, ku eksepshon di muhé na estado.” E grupo ei por kambia nan pasashi sin gastu, algun desena a hasi esaki último tempu. Pero zika tei mas largu kaba i e hendenan sigur ta bon na altura. E kantidat di kambiamentu di pasashi a kuminsá baha.”
Outor Pieter Hofmann