Na kuminsamentu di e ruta ainda tin hopi lugá pa mira karnaval grátis, pero turistanan mester sa esaki si – potrèt: Elisa Koek
WILLEMSTAD – Karnaval di Kòrsou probablemente ta un di e atrakshonnan turístiko di mas grandi. E potrètnan kolorido di e paradanan ta bria den hopi revista rònt mundu i a reportá e fiesta e aña aki den ocho idioma. Tòg karnaval no tabata agradabel pa tur turista. Pasobra hopi turista no sa eksaktamente unda nan por para kant’i kaminda pa mira e parada.
“Tur sorto di kos nan a yama nos”, Andrea Caanen ku ker a mira Gran Marcha ku su mayornan ku ta di vakashon ta konta. “Ora ku a bin sali ku mi tata no ta komprondé papiamentu bon nan a grit’é bai siña anto.”
E stèntnan i tin bia djis un lugá marká abou kant’i kaminda ya pa lunanan delantá ta reservá i pagá. Es ku no reservá un lugá hopi bia por djòin serka konosí pa un rekompensa di entre sero i algun shen florin. Bo mester sa si kon, unda i serka ken bo ta regla esaki.
Atmósfera tenso
Caanen i su mayornan a yega na parada trempan i a para nèchi pafó di e markashonnan ku ta bisa ku a paga pa e lugá aki. Kantu di e ruta tabatin hopi stul bashí i su tata di 61 aña ker a sinta un ratu. “Asta el a bisa ku e lo lanta asina un hende bini, pero un dama mes ora a kuminsá grita agresivamente”, Craanen ta konta. Asta ora el a lanta e atmósfera a keda tenso i nan tres a disidí di sigui kana.
“Go away, now!”, e pareha aleman Anna i Michael Kretschmer a tende. Nan dos a brua para entre e liñanan di un lugá pagá. “Nos no tabatin idea ma mesora tres hende ku tabata grita a aserká nos. Nan di ku hende manera nos ta kere ku nos por hasi tur loke nos ke.” E pareha a sigui kana i a trata di haña un lugá mas leu pero nada. Ora a kore ku nos un bia mas nos a bai kas. Pa nos fiesta a kaba.
Lástima
Pa Curaçao Tourist Board (CTB) e fiesta di karnaval ta un di e pilánan di mas importante. Riba nan website i e kampañanan den eksterior semper ta promové e fiesta. Bosero di CBT, Sonairie Kleinmoedig ta reakshoná emoshoná riba e relatonan. “Mi no tabata sa ku e kosnan aki tabata pasa i mi ta haña masha lástima.”
Segun Kleinmoedig Curaçao Carnaval Going Global, un organisashon nobo ku CTB ta spònser, e aña aki si a parti flyer entre otro na e hotèlnan. Akiden tabatin informashon tambe di un stènt di CCGG kaminda turistanan tabata bon biní. “Mester a paga pa esaki i tabata inkluí tur sorto di kos.”
Mas informashon
Tòg Kleinmoedig ta haña ku turista mester por para wak e parada kant’i kaminda i grátis. Espesialmente na kuminsamentu di e ruta tin sufisiente lugá, pero e turistanan mester sa si naturalmente unda ta mihó pa para. Kleinmoedig ta spera di aklará esaki otro aña. “Mi ta bai palabrá e relatonan aki ku maneho i kisas nos por pasa e tepnan aki pa turistanan mas mihó otro aña. Nèt Karnaval ta un fiesta pa tur hende.”
Caanen i su mayornan a haña un lugá tòg pa para wak e òptògt. “Nan a asta laga mi tata sinta un ratu riba un stul i nan a duna nos eis pa nos serbesnan kayente.”
Outor Elisa Koek