Aedis Aegypti ta plama Zika
KRALENDIJK – A konstatá e viro di Zika na Boneiru. E Departamentu di Salubridat Públiko ta reportá un kaso konfirmá.
Probablemente e kontaminashon di e pashènt a tuma lugá na Boneiru. Pasobra den mayoria di kaso e enfermedat ta sosodé sin síntoma grave, e departamentu di salubridat públiko no ta ekskluí ku mas hende a haña Zika kaba na Boneiru.
Pa kombatí zika gobièrnu ta konsehá pa kita e posibel lugánan di brui – tur kaminda ku awa dushi por keda para aden, pa bista paña protektivo i usa spray kontra sangura. Espesialmente hende muhé na estado ta konsehá nan pa usa bon protekshon, pasobra ta posibel ku zika ta peligroso pa yu ku no a nase ainda. Nan ta kore riesgo di haña ‘microcephalia’, sesu ku no a kaba di krese.
E sangura Aedis Aegypti ta transmití zika, e sangura ku ta transmití dengue i chikunguña tambe.
Outor Janita Monna