Tin referensia na e kabes grandi di beibi di Kòrsou, pero nunka promé no a investigá desaroyo di sesu.

Tin referensia na e kabes grandi di beibi di Kòrsou, pero nunka promé no a investigá desaroyo di sesu

WILLEMSTAD – E ginekólogonan i parteranan den koperashon ku GGZ a kuminsá un investigashon bou di muhé na estado na Kòrsou. Ta monitòr tur muhé bou di kòntròl, pa asina haña un bista mas kla di e desaroyo di sesu di un feto i defekto eventual.

“Nos ke pa tur muhé na estado mas pronto posibel kai bou di kòntròl un kaminda”, Peter van Heesch, spesialista di eko i partero ta konta. “Asina nos por kuminsá trempan ku eko i registrashon di desaroyo.”

Na Kòrsou mas o ménos 2000 beibi ta nase pa aña. Den añanan anterior un promedio di tres yu tabata nase ku mikrosefalia, un kabes muchu chikitu. Awor ku kisas tin un relashon entre e viro di zika i mikrosefalia, ginekólogonan i parteranan a traha un protokòl.

Kasi mesora despues di a registrá zika (20 di yanüari) a lanta e protokòl i e tin dos banda. “Nos ke informá muhé tokante di zika i kon nan por evitá un infekshon, pero nos ke buska drechi tambe kon ta na Kòrsou eksaktamente ku e desaroyo di sesu di un feto”, Van Heesch ta bisa.

Balor adishonal
E investigashon no tin solamente un balor adishonal pa e konosementu di zika. Mikrosefalia ta bini ora tin un defekto di sesu, pero e defekto aki a kuminsá mas promé. “Pa motibu di un mal desaroyo di sesu no solamente bo ta haña mikrosefalia sino tambe por ehèmpel Síndroma di Down. Tambe pa konosementu na Kòrsou di esaki e investigashon aki tin balor adishonal, pasobra no tabatin e datonan aki nunka.” Aktualmente tin referensia si tokante por ehèmpel grandura di e kabes di beibi na Kòrsou, pero un investigashon di e desaroyo, riba e eskala aki nunka no tabatin.

E investigashon ta dura te ora bini mas klaridat. Muhé na estado tur ta haña informashon delantá tokante e investigashon via un formulario ku nan por firma. Si bin sali ku un muhé tin zika un ginekólogo ta sigui trat’é. Tambe lo hasi por lo ménos un eko èkstra na 32 siman. Esei normalmente ta e di tres eko i SVB ta paga pa dos so. “Nos ta den deliberashon ku SVB ainda pero nos ta hasi e di tres eko kaba”, Van Heesch ta bisa.

Sobrá akshon
Entretantu a konfirmá 35 kaso di zika na Kòrsou. ADC ta traha huntu ku gobièrnu na un tèst ku por demonstrá zika mas lihé den sanger i orina. Tambe GGZ a habri dos liña pa kontestá pregunta òf pa pidi kòntròl pa un bario: e number ta 0800-0888 (grátis) i 9345. E number grátis ta fásil pa alkansá pero no por yam’é ku un telefon selular. E number di kuater sifra si pero despues di a purba vários bia e no tabata alkansabel.

No tin pániko
Ounke mundialmente tin miedu di zika ta manera e inkietut bou di muhé na estado na Kòrsou no ta masha grandi. Segun partera Annemieke Plugge e ta diferente serka kada muhé pero sigur no tin pániko. “Hende muhé ku tin mas tantu tempu ta biba na Kòrsou, a kustumá ku e kosnan aki. Pasobra ta un isla tropikal. Naturalmente nos ta haña pregunta si, i e muhénan ta kontentu ku e ekonan èkstra, pero pániko mes sigur no tin.”

Outor Elisa Koek