Virólogo Byron Martina di Erasmus Medisch Centrum
DEN HAAG – Aruba, Boneiru i Kòrsou ta pará na kuminsamentu di un epidemia di zika. Asina Bryan Martina, virólogo di Sentro Médiko Erasmus (MC) na Rotterdam ta pensa.
Martina ta enfatisá ku paisnan den reino mester koperá riba tereno di Zika. “Mi ta kere tambe ku e intenshon t’ei. Wak kiko por hasi huntu i kon mester lanta esaki.”
E islanan por ehèmpel por usa e ekspertisa di Erasmus MC bon. “E pregunta di mas importante awor ta: Zika ta responsabel pa mikrosefalia? Pasobra te awor ta na Brazil so a konstatá esaki.” Mikrosefalia, kaminda beibi ta nase ku un kabes chikí i ku sesu insufisientemente desaroyá, a opservá solamente den e partinan di mas pober di Brazil. Segun Martina pobresa ta kousa ménos kombatimentu di sangura, i asina e sanguranan por transmití enfermedat mas fásil.
Martina: “Korsou no ta berdaderamente pober, ounke ku tin bario pober. Pero den bario riku tambe tin lugá di brui. Na final mi ta kere ku lo bini un epidemia na Kòrsou i na e otro islanan tambe. Pasobra bo no por evitá un epidemia ku ta sangura ta transmití.”
Minister di Salubridat Públiko Edith Schippers durante e deliberashon tokante e viro zika
Tweede Kamer
Den Tweede Kamer awe a papia tokante e viro zik. Minister di Salubridat Públiko Edith Schippers (VVD) a bisa ku e ‘sense of urgency”den Hulanda Karibense ta sufisiente.
E mandatario ta pensa si pa introdusí un deber di mèldu ora konstatá e viro di zika.
Awor esaki no ta mandatorio pasobra segun e e sistema di mèldu informalmente ta traha bon.
Sentralisashon
Probablemente Schippers ta bini na aprel ku un proposishon di lei pa sentralisashon. Gobièrnu sentral ta bira responsabel pa evitá ku sangura tropikal ku ta transmití enfermedat ta establesé nan mes na Hulanda. Aktualmente e responsabilidat aki ta serka munisipionan. E minister ta pensa ku por eksihí medidanan mas mihó ku supervishon di henter pais.
No ta eradiká
Schippers ta bisa ku e proposishon t’ei pa evitá ku sangura tropikal establesé nan mes. Na Hulanda Karibense e sanguranan aki a establesé nan mes kaba. Riba e pregunta di miembro di Tweede Kamer Reinette Klever (PVV) ku no mester eradiká e sanguranan riba islanan BES e mandatario ta kontestá: “Nò, ta imposibel pa eradiká e sangura einan.”
Outor Pieter Hofmann