Gerrit Schotte i Cicely van der Dijs ta yega korte – potrèt: Dick Drayer
WILLEMSTAD – E derecho riba privasidat i e derecho riba un proseso hustu den e kaso Babel a keda lastimá, abogado Eldon ‘Peppie’ Sulvaran ta bisa. Eks promé minister Schotte ta e víktima di un mafia kolonial, e ta remarká. “Gobernador i prokurador general ta esnan ku a eksihí e kaso Babel. No por t’asina ku hende importante ta malusá nan poder pa eliminá un oponente polítiko.”
Ta sospechá Schotte di entre otro soborno atministrativo, labamentu di plaka i falsifikashon di dokumento. Mester deklará Ministerio Públiko (OM) no suseptibel, Sulvaran ta eksihí. Supsidiariamente mester keda sin konsiderá e notifikashonnan di MOT i mas supsidiariamente Sulvaran ta pidi kastigu hopi ménos.
OM awe a eksihí tres aña no kondishonal den sèl pa Schotte, inkluso ku mester kita su derecho di vota pa sinku aña, ke men sinku aña e no ta elegibel tampoko komo polítiko.
Derecho di no papia
Schotte i su partner Cicely van der Dijs – a pidi diesocho luna di kua nuebe ta kondishonal ku un periodo di prueba di tres aña pé – a apelá nan derecho di no papia. “A traha un konstrukshon di faktura falsu i kuenta di banko strañero pa evitá ku un hende lo haña sa ku ta doño di kasino Francesco Corallo tabata paga Schotte” fiskal Gert Rip ta bisa
Marioneta
E doño grandi di kasino segun OM lo ta envolví den lantamentu di e partido polítiko MFK i tabata tuma desishon de tur nombramentu. Asina mester a nombra Rudolph Baetsen komisario na Banko Sentral i a rechasá un kandidato pa e puesto di minister, asina OM ta konkluí pa medio di karta ku nan a interseptá. “Schotte tabata atendé interesnan di Corallo i asina a degradá bira un marioneta. E ta un polítiko korupto.”
Outor Anneke Polak