Marie Pampoen – potrèt: José Manuel Dias
WILLEMSTAD – E desaroyo di e kosta di Marie Pampoen ku mester a start for di aña pasá ta wantá pa motibu di un rapòrt di CARMABI tokante e kantidat di koralnan presente. “E rapòrt a duna komo resultado ku entre 2011 pa aworakí e densidat di koralnan a bira mas grandi” Asina minister Suzy Camelia-Römer di Planifikashon Urbano a duna di konosé.
E resultado aki ta pone ku no por kumpli ku e kriterio di sinku porshentu ku Outoridat Marítimo a stipulá i komo tal e instansha aki no por duna pèrmit pa konstruí kibraola manera originalmente tabata e plan. E kriterio ta enserá ku si e densidat di koralnan ta mas haltu ku sinku porshentu no tin mag di konstruí nada den laman. Konsekuensia di esaki ta ku a bini un kambio den e plan pa desaroyá e kosta di Marie Pampoen.
Un reportahe di José Manuel Dias:
E kambionan ku a hasi den e proyekto ta basá riba un kuadro nobo ku Konseho di Minister a aprobá den kual ta tene kuenta ku tur lei i tratado ku ta regla naturalesa i medioambiente. Den e diseño nobo lo no inkluí kibra ola i lo desaroyá únikamente e parti riba tera. Minister Camelia-Römer no por a bisa ta ki dia lo por start ku e desaroyonan riba tera.
Outor José Manuel Dias