Siudadanonan ta bini ku sugerensia pa futuro di Boneiru – potrèt: Janita Monna
KRALENDIJK – Sigur 50 siudadano último simannan a yuda pensa tokante solushon pa problema ku Boneiru tin. Den e gruponan a papia di pobresa, ekonomia i ‘representatividat’, temanan ku pronto tambe lo ta riba agènda ora Boneiru mester bai negoshá ku Hulanda tokante e punto di bista di gabinete tokante e rapòrt di Spies.
E sala tabata yen djaluna anochi ora Clark Abraham, diputado di Relashonnan den Reino, a presentá e resultadonan, ma no yen manera dia a lansa e inisiativo.
Laso ku Hulanda
Mayoria di esnan presente lo ta ‘kontentu’ ku gobièrnu ke tende di siudadanonan kon mester sigui ku e isla. Pasobra despues di e resultado di e referèndem di 18 di desèmber, i despues di e rapòrt di evaluashon krítiko, ta kla ku Boneiru no ke sigui na mes manera ku Hulanda.
“E koperashon entre Boneiru i Gobièrnu di Reino mester ta basá mas riba igualdat” a trese dilanti durante e diskushonnan den grupo.
Leinan
“Pero por kanselá e leinan hulandes?”un señora ta puntra ora despues di presentashon di e resultadonan sigui diskutí? “Nò”, Abraham ta kontestá, “esei no por asinasina. “Si sugerí aki pa kambia e sistema di impuesto, mi no por primintí ku esaki lo sosodé.” E ta enfatisá: “Mester negoshá tokante tur kos ku ku Hulanda. Pero si e punto di bista di gabinete aworó no reflektá kiko nos ta trese dilanti, nos no ta bai di akuerdo.”
Diputado Clark Abraham i un di e partisipantenan – potrèt: Janita Monna
15 di mart e dokumento ta riba mesa pa promé bia. “E ora ei nos ta papia ku un amtenar”, mandatario Abraham ta bisa, pa enfatisá e desigualdat entre Hulanda i Boneiru. Partisipante Suzanne Thodé: “Sea sigur. Defendé e rapòrt aki. Tene kuenta ku ta generashonnan ta bai pèrdí si no bini kambio.”
Abraham ta satisfecho ku e envolvimentu di e siudadanonan. I ounke e ta mira bunita sugerensia entre e resultadonan e ta haña alabes ku e proseso tabata por lo ménos mes importante ku e resultado.
Mito
Ta remarkabel ku e otro dos diputadonan i e miembronan di konseho insular no t’ei. Mientras ku segun e presentenan ta di gran importansha pa oposishon i koalishon koperá riba e trayekto aki. E partisipantenan ta ferwagt gobièrnu abierto tokante e resultadonan di e kombersashonnan ku Hulanda, Jose Antonio Capella ta bisa. “Nos a biba hopi tempu ku e mito ku nos mes no por i ku nos tabatin mester di otro hende.”
Abraham ta mira e bos di pueblo komo ‘un kuminsamentu’. “Esaki ta un modelo ku nos por sigui traha riba dje.”
Outor Janita Monna