Mayoria di e habitantenan sa eksaktamente ta ken a kometé kiebro i atrako – potrèt: Elisa Koek
BÁNDABOU – “Turista no ta seif i nos no ta seif”un habitante preokupá di Westpunt ta bisa. Un kuarenta hende a bini huntu na hotèl Kurá Hulanda na Westpunt pa papia tokante un solushon pa e atrakonan den e parti aki di Kòrsou.
Segun Tirso Petroudis di Fundashon Vishon Bandabou (ViBa) e ousensia di polis ta un problema konosí: di e sinkushen polisnan na Kòrsou ta 28 so tin e tarea di wak Bándabou. Ta p’esei ViBa poko tempu kaba ta deliberá ku gobièrnu i polis. Segun John Reuben, ku a kuminsá ku ‘Saving Westpunt’ i ku den un siman a haña shen hende pa sosten’é riba Facebook, no mester warda ayudo djafó.
Dos atrako riba turista pa Reuben tabata motibu pa sondia serka su bisiñanan ken tabatin interes den akshon. Mayoria di e presentenan ta di akuerdo kuné, pero tòg nan no ta bini kla. Ideanan manera ‘neighbourhood watch’ ta kai hopi bon serka sierto hende miéntras ku otro no ta mira e benefisio. “Mi ker a sondia espesialmente ken ke akshon pa patruya nan mes den bario, pero mayoria no tabata ke esaki.
Henter Bándabou tin 28 polis
Koperashon
Por lo pronto Reuben ta djòin e akshonnan di ViBa. A lanta e fundashon un dos aña pasá i banda di kriminalidat nan ta trata e falta general di previshon na Bandabou. Asina a traha un plan nobo pa pone bombero i un vehíkulo ku por kore den e pòst di brantwer ku no ta funshoná. Djabièrnè pasá a palabrá ku polis pa reuní tur luna. “Nos ta palabrá nos plannan i kon nos por uni esakinan ku esnan di nan”, Petroudis ta bisa.
No tin solushon
Si esaki ta e solushon nan no sa. E falta di polis riba kaya no a keda solushoná. Mayoria di e habitantenan entretantu a pèrdè konfiansa den polis. “Mi ta pensa ku mester bini akshon lihé “, Reuben ta bisa. “Pasobra mi tin añanan largu ta tende ku algu lo bai kambia i ku tin reunion, ma nunka nada no ta sosodé. P’esei mi ta kere nos mes mester hasi algu.”
Petroudis ta di akuerdo ku Reuben su opinion. E tambe ta kere ku ta e habitantenan mes mester hasi algu. “Nos tur sa ku gobièrnu no tin plaka i por lo pronto ta e 28 polisnan so nos lo keda kuné. Mi ta kere anto ku nos mes mester hasi algu, pero den koperashon ku polis si. Por ehèmpel pa medio di duna nan tep, nan por traha mas efisiente. Mayoria bia nos sa eksáktamente ta ken a kometé e kiebro.”
Outor Elisa Koek