I AM A B*TCH crew – potrèt: Facebook
WILLEMSTAD – Vários instansia manera Skuchami i Bos di Hubentut ta batiendo alarma den nos komunidat ku violensia i akoso seksual kontra di hende muhé ta kresiendo ku un velosidat alarmantemente. “Apesar di loke eróneamente a keda bisa den publisidat, lamentablemente no tin datonan konkreto”, Sheila Albertoe, di Bos di Hubentut a atmití.
Según Albertoe, e mucha djawendia ta keda influensiá dor di otro kos, ku esnan anterior no a keda influensia dor di dje. “Mester kuminsá papia di seksualidat na un edat hopi mas hóben ku nos yunan, pa asina nan sa kiko na derechonan ta”, ela kompartí. Según Albertoe, tin un brecha grandi entre e mayor i su yu, unda mayornan no sa kon pa papia ku nan yunan, i no sa kasi nada di medio sosial of kiko su yu ta hasí ei’riba. Hopi biaha, un agresor ku ta agredí of viola un hende muhé, su frustrashon no ta bini di dia pa nochi i hopi biaha a keda nutrí dor di un kultura machista i otro medionan.
Dongo
Ta parse ku nos komunidat tin algun estandarda dòbel pa ku e seksualidat i komportashon di hende muhé. Según e konosido rèper Dongo, kende su delaster single PATU kómikamente ta deskribí kiko, den su opinion, ta e komportashon di un muhé kabes habri. “Berdat tin un dòbel standart ku nos hende hòmber ta lanta ku n’e i e no ta honesto, paso hopi hende hòmber tambe ta kana hasí kos kuestionabel”, ela admití. E kantika a kousa hopi konsternashon riba Facebook, dividiendo opinion entre e dos kampamentunan.
Rèper Dongo – potrèt: Facebook
Dongo a haña e diskushon hopi interesante, pero ta lamenta ku no ta tur hende a komprondé su mensahe. “Mi ke habri tur hende su wowo, ku material i sèn no tur kos den bida i mi ke konsientisá e hóben pa nan no bende nan mes pa kos. Hopi muhé ta wòrdu usa paso nan ta stima sèn”, ela splika. Den fiesta Dongo ta observa ku e mayornan a bira más los ku nan yunan kompará ku antes. “Tin menos regla, kontrol i supervishon. Antes bo no tabata mira tantu mucha chikitu den fiesta manera awó”, ela kompartí.
Albertoe na otro banda, ta enfatisá ku tur kos ku ta pasa awendia tabata pasa antes tambe, solamente awendia e ta mas públiko. “Muhé semper tabata haña mal nòmber, pero e hòmber semper a sali ileso, loke ta un ridikules”, ela kompartí.
I AM A B*TCH
Ydellienne Heerenveen, organisadó di e seminario motivashonal I AM A B*TCH, ta di opinion ku ta bon ku un muhé ta sinti su mes bon ku su kurpa i ta disfruta di su seksualidat. E ke empodera e hende muhé kurasoleño ku e no mester ta dependiente di niun hòmber. “Un hòmber no ta un manera pa yega na kos, i nos mester stop di hungá víktima”, ela splika. Según Heerenveen, palabra tin hopi poder i ta fásil pa husga i desbarata un muhé, sin sa e retonan ku e tin di enfrenta diariamente i kiko e mester hasí pa kria su famia.
Lamentablemente, nos komo hende muhé mes ta bon den denigra otro. “Mi no sa ku esei ta hustifiká e etikèt, mirando kuantu violensia tin awendia kontra di hende muhé. Awor mi ta realisá ku ni maske si e komportashon ta bai kontra normanan den nos komunidat, esei nunka ta hustifiká abusu verbal i violensia”, ela atmití.
Gobièrnu
Albertoe di su partí kouteloso, pasobra e no sa realmente kon na serio gobièrnu ta tuma kombatimentu di abusu seksual i violensia doméstiko. Heerenveen ta spera ku dor di kompartí nan eksperensianan i historia ku e públiko, esaki lo enkurashá e hóben pa tuma mihó desishon i aspira pa ta ekselente. “Si nos logra esei, na final tur esaki lo tabata bale la pena”, ela finalisá.
Outor Deya Mensche