Ora kompartí puntonan positivo tambe, mayornan ta haña mas interes den skol – potrèt Elisa Koek
WILLEMSTAD – “Nos a papia ku mayor ku no tabata sa nòmber di e dosente di nan yu, òf ku no tabata tin un idea den kua klas nan yu tabata. Esei mester a kambia:”, Zorinda Huisden-Curiel, kabes di skol di Sint Anthonius College ta konta. P’esei e skol a kuminsá ku un manera nobo pa atraé e mayornan pa bin i skol.
Segun Karin Hermans, sikólogo di mucha na ‘Yudaboyu’ e problema sigur no ta solamente serka e mayornan, sino pa un gran parti serka e dosentenan. “Hopi dosente ta yama mayornan ku keho tokante nan yu pero kasi nunka nan no ta konta kos positivo. E ora ei mayornan ta fada lihé di e kombersashonnan aki.
Dosente rabiá
Ilse Berkhout tin añanan ku e no a bai e anochinan di mayor. Su yu di ocho aña ta dislektiko, pero segun e esaki no ta sali na kla na skol. “Tin bia dosente rabiá ta yama mi na trabou. Mi no tin tempu di splika kada bia di nobo kiko ta e problema.”
Hermans ta bisa ku esakinan ta keho konosí. “No ta tuma e splikashon i solushon di e mayornan na serio.” Pasobra e mayornan no tin konfiansa den e dosentenan, nan ta pèrdè interes den skol. Asina nan ta pèrdè mitar di e aktividatnan diario di un mucha. “E ora ei un mucha ta sinti su mes neglisha i ta pèrdè konfiansa den su mes.”
Atenshon èkstra
Komo ehèmpel Hermans ta menta un mucha hòmber di diesun aña ku e tabatin ta trata. Añanan largu a kere ku ta gagu e tabata i e tabata trese problema den klas. Te ora a wak pakiko e ta gagu: e tabata gagu solamente ora e mester a lesa dilanti klas. “E ora ei a bin sali ku e no por a lesa niun ora i niun hende no a ripará esaki. Semper e tabatin e sintimentu ku e ta faya ora e hasi algu fout. Ku un tiki profundisashon i atenshon por a evitá esaki.”
Hopi dosente tin un klas muchu yen. Ta manera e ora ei no tin basta tempu pa kuido i atenshon èkstra pa un alumno, pero tòg Hermans ta pensa ku ta nèt esaki por spar hopi tempu. “Un mucha ku problema di kondukta ta influensia henter e klas. Si por studia e problemátika aki, si bo djis duna un tiki mas atenshon, por influensiá henter un klas positivamente.”
Nos ke ku nos sa tur kos
Na Sint Anthoniuscollege tin tur sorto di mucha, tambe den un situashon na kas ku no ta ideal. “Tin bia nan no a kome òf nan mayornan no t’ei”, Huisden Curiel ya konta. Situashonnan asina por ta bergonzoso pa mayornan i ta nèt esaki ta hasi difísil pa e dosentenan haña kontakto. No tabata straño si nan keda sin bin buska un rapòrt añanan largu Pa yega mas serka di e mayornan, e dosentenan a bai wak nan mes. “Kisas nan ta haña ku ta muchu nos ta kere ku nos sa tur kos. Esaki nos ta purba kambia ku habrimentu di porta literalmente.”
Via ‘Parents University’,un programa ku diferente aktividat ku mayornan por partisipá na dje, nan ta purba envolví mayornan den skol. Saliendo for di e aspektonan positivo di un mucha, e bishita na skol ta haña mas balor. “Si tin kos negativo, nos ta trese nan dilanti pa solushon nan huntu. Nos ta ripará ku esaki ta traha, mayornan ta haña agradabel pa ta envolví den skol. Asina skol por bira un haf seif pa mayornan i muchanan i esei ta nos meta.”
Outor Elisa Koek