Van der Dijs (na man robes) i Schotte mes ora despues di e sentensia ta laga sa ku nan ta apelá – potrèt: Anneke Polak
WILLEMSTAD – Wes a kondená èks promé minister Gerrit Schotte (MFK) na tres aña den sèl inkondishonal i sinku aña di eksklushon di derecho di vota pasivo. “Ta remarkabel ku wes a tuma ofer henter e rekisitorio di OM. E enkargo tabata kla: Schotte mester a bai”, asina e èks promé minister mes a bisa despues di e sentensia.
Wes ta haña ku ta probá ku Schotte entre otro ta kulpabel di soborno atministrativo, loke ta kulp’é hopi pisá. “Ku su aktuashon Schotte severamente a daña e konfiansa ku siudadanonan mester por tin den un gobièrnu ku integridat”, wes ta bisa, i e ke men e influensha ku e doño di casino Francesco Corallo tabatin riba Schotte.
Anneke Polak ta papia ku Gerrit Schotte i abogado Eldon ‘Peppie’ Sulvaran
Abogado Eldon ‘Peppie’ Sulvaran a indiká ku den e kaso Babel lo apelá e kondena di Schotte i su partner Cicely van der Dijs, kende a haña kastigu di diesocho luna, di kua nuebe luna kondishonal i dos aña di periodo di prueba. “Es ku gana e bataya ainda no a gana e guera”, segun Sulvaran.
Plakanan kriminal
A kondená Schotte riba tur punto: Falsifikashon di dokumento, labamentu di plaka, poseshon di jammer, denunsio falsu di pèrdida di pasaporte diplomátiko i soborno atministrativo. Wes: “E labamentu di plakanan kriminal ta forma un menasa di ekonomia legal. Schotte ta pone su mes interes dilanti i ta gaña instanshanan ofishal sin eskrúpulo.
Minister Ronald Plasterk di Relashonnan den Reino no ke reakshoná riba e sentensia, miembro di parlamento di VVD André Bosman si. “Mi ta kontentu ku e ta bai será. Schotte ta un di esnan ku ta kousa pobresa na Kòrsou.”
Niun hende no ta inviolabel
Miembro di parlamento pa SP Ronald van Raak: “Awe a kuminsá ku e limpiesa grandi di polítika na Sint Maarten i Kòrsou. Ta di spera ku lo sigui hopi kaso kontra polítikonan i hendenan di e mundu di wega di plaka.” Roelof van Laar a bisa ku ta “tristu ku un èks promé minister a haña kastigu pa delitunan asina pisá. “Esaki ta prueba e laso entre MFK i mafia. Na mes momento mi ta kontentu ku niun hende, ni un èks promé minister no ta inviolabel na Kòrsou. Ta di spera ku Schotte lo no bolbe bèk den polítika nunka mas.
Outor Anneke Polak den koperashon ku e korespondentenan na Hulanda