Gerrit Schotte i Cicely van der Dijs despues di e seshon – potrèt: Anneke Polak
WILLEMSTAD – Lider di MFK Gerrit Schotte no ta impreshoná pa e krítika riba su persona, awor ku e ta keda miembro di Staten despues di su sentensia. “Si nan ke nan kambia lei”, e ta laga sa. Te e dia ei e lider di oposishon di mas grandi ta keda.
No ta straña presidente di Staten Mike Franco ku Schotte no a entregá su retiro serka dje. “Mi no tin niun medida disponibel pa bisa ku e no por bini. E mes por a bini Staten bin bisa ku e ta retirá. Ma mi no ta ferwagt esei, aki ta trata d moral propio.”
Miembro di Staten independiente Omayra Leeflang awe a ekspresá su dessatisfakshon den Staten. “Ta hopi tristu, pero bo no por hasi nada. Ta tristu ku un mienbro di Staten no tin e outoridat moral pa retirá.” E sugerensia di Schotte pa entregá un kambio di lei Leeflang no ta aster. “Esei lo ta kontra e Staatsregeling, ku ta bisa ku ta wes so por kita un hende su derechi di vota.”
Djabièrnè a kondená Schotte na tres aña den sèl entre otro pa labamentu di plaka, falsifikashon di dokumento i soborno atministrativo. El a apelá.
Kódigo di kondukta
Lider di PAIS Alex Rosaria na nòmber di koalishon a skibi un karta den kua ta insistí pa Schotte tuma su retiro. Pa evitá ku Leeflang i su partido nobo Un Kòrsou hustu un dia haña nan den un situashon asina, el a skibi un kódigo di kondukta kaminda tin pará ku frakshon ta baha minister sospechoso i partido por saka miembro di Staten sospechoso for di parlamento.
Outor Anneke Polak