E lei ta solamente un komienso pa mihó akohida di mucha na Aruba – potrèt: De Schatkist
ORANJESTAD – Aruba for di 1996 ta trata di regla akohida di mucha pa lei, sin resultado. Awor tin un konsepto den parlamento, pero durante un presentashon na públiko parse ku ainda tin hopi mas di hasi ainda pa mas kalidat den akohida.
Promé públiko a tende e resultadonan di un investigashon bou di sentro di mucha di sero te ku kuater aña, ku Rosalin Kock a hasi pa su estudio di Master. El a entrevistá mayornan, lidernan di krèsh i ekspertonan i puntra nan si nan ta haña ku e sentronan ta kumpli ku e eksigensianan di kalidat pa edukashon i kondishonnan adishonal manera alohamentu i seguridat.
“Mayornan i lidernan ta haña esakinan bon miéntras ku ekspertonan no ta haña nan sufisiente”, Kock ta menta komo resultado mas importante.
Nivel di e lidernan
Tòg e ta konfirmá ku bo no por konkluí awor ku e sentronan ta kualitativamente bon. “Aktualmente nos no tin lei i regla pa midi esaki. Mi a usa un modelo pero esnan ku a puntra nan no por midi esaki na nada i nan a usa nan propio interpretashon”.
Un terser parti di e lidernan no tin un edukashon profeshonal i un terser parti tin nivel di LBO. “Esaki ke men ku nan no ta sufisientemente na altura di kriterionan i eksigensianan di kalidat.
Ke men sigur sigur mester di un lei di akohida di mucha, Kock ta bisa. Entre sero i kuater aña ta pone e base. For di mi investigashon a sali ku 95 porshento di e muchanan ta bai akohida 5 dia pa siman. Ku e lei nobo mucha por bai akohida 12 ora pa dia. Esei ke men ku nan ta haña masha hopi kuido, i edukashon einan.
Pèrmit
Tin kasi shen sentro di akohida na Aruba. E kantidat ta krese. Tur hende por start un akohida i no tin kòntròl. Ántes gobièrnu a yega di sera akohida pero esei tabata pa peliger di kandela. Tur hende por traha komo lider di krèsh, asta si nan tin un strafblat.
Ku e lei nobo esaki ta kambia. Pa akohida di mas ku sinku mucha mester di un pèrmit. Bo mester kumpli ku sierto eksigensia. Ku un strafblat (por ehèmpel pa delito di froude, kontra moral òf bida) un hende no por manehá un akohida ni traha na un. E eksigensianan ta varia di masha detayá (kantidat di trahadó pa mucha, areglo di keho, komishon di mayor obligatorio) te masha general.
Supsidio
Kock ta bisa ku tin ‘muchu kos ku ainda ta vago’, pa por husga si e lei lo ta efektivo. E ta señalá si ku e sentronan di mucha lo haña hopi tarea aserka. Miéntras ku nan tin nan mannan yen kaba, ku tiki personal, pa tene e gastunan abou.
Gobièrnu ta supsidiá e akohida di despues di skol sí (Traimerdia). Akohida di mucha pagabel ta masha importante, Kock ta bisa. Sigur pa Aruba kaminda hopi hende ta gana suèldu mínimo ku ta mas a bou ku e nivel mínimo di eksistensia. “Nan tambe mester por manda nan yunan un akohida kalitativamente bon. “
Outor Sharina Henriquez