Gerrit Schotte i promé minister Mike Eman na 2010
ORANJESTAD – E lidernan di MEP, AVP, i PDR ta bisa ku nan no tabata na altura di e lasonan entre Gerrit Schotte i Francesco Corallo. E lidernan di partidonan arubano ademas ta ninga ku e doño sisiliano di kasino, a bini serka nan, manera serka e èks promé minister kurasoleño.
Segun lider di MEP Evelyn Wever – Croes, OM di Kòrsow , kontrali na esun di Aruba, tin kurashi si. “E ta prueba tambe ku no ta hasi diferensha ken mester investigá. Mi ta spera ku, ku e sentensia aki, OM di Aruba tambe lo bai den e direkshon aki, pasobra no tin lógika tras di un diferensha asina den manera di hasi si bo kompará Kòrsou ku Aruba.”
Ku esaki Croes ta indiká e aktual insinuashonnan kontra minister di infrastruktura Sevinger i miembro di Staten di AVP Melvin Tromp tokante biramentu di man ku terenonan di domein. “Mi mester kòrda nòmber di e fiskal di Kòrsou bon pasobra asina nos ta den gobièrnu atrobe, mi ta bai pidié bini aki pa bin investigá e aktual ministernan.”
‘Sosten moral’
Durante e kampañanan di elekshon di 2009 i 2013 Gerrit Schotte diferente bia tabata presente na evento di MEP. Na 2013 asta el a kompañá Evelyn Wever-Croes bai vota. “Korekto”, Croes ta bisa. “Esei tabata sosten moral ku e dia ei el a duna pa djis un ora. Banda di esaki e no a hunga niun papel den e kampaña, ni despues tampoko. Mi no a sigui henter e karera polítiko mes di Schotte, pasobra semper mi tabata okupá ta investigá e violashonnan di integridat na Aruba i denunsiá nan.”
Croes ta bisa ku e ke warda te ora e sentensia bira irevokabel promé ku e kontemplá bira lomba pa Schotte pa semper. “Ounke mi ta kere sigur ku tur hende meresé un di dos oportunidat.” E lider di MEP ta bisa ku e tempu ei e no tabata na altura di e lasonan entre Schotte i Francesco Corallo.Ora ku a puntr’é si kisas Corallo por a buska kontakto ku MEP via Schotte e ta deklará: “Mi no konosé Corallo i nunka mi no tabatin kontakto kuné.”
Meskos ku Croes tantu presidente di frakshon di AVP Rene Herdé komo lider di AVP Mike Eman ta bisa ku nan partido no tabata sa di lasonan di Schotte ku Corallo. E doño di kasino ku ta biba na Sint Maarten nunka tampoko no a buska kontakto ku nan partido. Tokante posibel spekulashon rònt di e partido di oposishon Herdé ta bisa: “Nan lo t’ei pero ami mes ta bisa ku miéntras ku no tin prueba fiho, no tin motibu pa kere ku ta bèrdat. Komo polítiko tin bia bo ta para riba potrèt ku un hende kaminda despues ta bin sali ku algu no tabata bon.”
Tanti Herdé komo promé minister Eman ta bisa ku nan kontakto ku Schotte no tabata masha kaluroso. “Nos kada un tabata mira e relashonnan den Reino na un manera diferente”, segun Eman. E promé minister ta yama e detenshon di Schotte “masha doloroso i masha lástima pa e persona.”
Retirá
Awe meinta Schotte a apelá e sentensia. Lider di PDR Andin Bikker ta indiká ku entretantu Schotte su funshon ‘na promé lugá ta algu di Kòrsou su órden hurídiko i polítika’. “Aki lo e mester a retirá for di polítika.” Bikker tambe ta ninga ku e tabatin kontakto ku Corallo.
Outor Ariën Rasmijn