Donate Philbert–Nieveld, Kenneth Valpoort i Mike Willem
WILLEMSTAD – Según Kenneth Valpoort di Horecaf i Mike Willem di Asosiashon di Kontratistanan Kòrsou, 80/20 ta un desaroyo positivo i no mester deskartá esaki. Donate Philbert – Nieveld, sektor direktor di Departamentu di Labor ta kere ku e éksito di e lei ta determina pa e kapasidat pa ehersé kontrol efektivamente. Te ainda minister Ruthmilda Larmonie no por pasá e tan antisipá lei di 80/20 pa motibu di e tantísimo krítika di sierto gruponan di interes den nos komunidat manera VBC i Asosiashon di Supermerkado.
“Aktualmente, Departamentu di Labor no tin un sektor di kontrol interno mas, i loke ta trata di kontrol eksterno, tin un entidat ku ta kai direkto bou di minister”, Philbert – Nieveld a splika. A reforsá e tim di kontrol ku 24 persona ku a keda interna pa bai ehersé e tarea akí, pero nan tin un kontrakt di un aña so.
Inspektor
“Si bo ta bai implementa 80/20 efektivamente, bo mester tin un órgano interno i eksterno di ámtenarnan ku por ehersé e trabou pa tempu indefiní”, Philbert – Nieveld a kontinuá. Según Mike Willem, kende su asosiashon ta representa 34 kontratista, e nivel di inspektor ta hopi importante, pa asina nan por duna kontenido na e kontrol, sino esaki ta enbano.
Valpoort, kende ta sekretario general di Horecaf i tin aproksimadamente 500 miembro, ta lamenta ku e lei ta keda mal interpreta, pasó porfín nan sektor ta tende ku algu ta keda hasi. Según Valpoort, espesialmente den e hotelnan di tamaño mediano i esnan bou di maneho hulandes, e yu Kòrsou ainda ta sub representa. “Si tin espasio pa e yu di Kòrsou traha, e tin di haña e preferensia”. Kontratistanan tambe ta konstatá un problema grandi ku e avalancha di trahadó venezolano, siendo ku tin lokalnan sinta na kas sin trabou.
“Fo’i e punto di bista akí nos ta pro 80/20, paso e lei lo detené e fluho”, Willem a splika. Departamentu di labor ta realisá ku e empresario tin e tendensia di tuma hende djafó paso e ta mas barata. “Dor di diferensia entre su valuta di sèn kompará ku esun di nos, p’e ela gana hopi mas tantu”, Philbert – Nieveld a agrega.
Según Valpoort, gobièrnu mester invertí pa forma e trahadó pa e por kumpli ku e kalifikashon mínimo i e hendenan mester haña e oportunidat pa sigui desaroyá su mes na su lugá di empleo. “Empresarionan ke trahadó ku tur tipo di kalifikashon, pero no ta invertí sufisiente den e trahadó ni ta kreá un sistema di introdukshon na e trabou”, Valpoort a splika. Según Philbert – Nieveld, gobièrnu ta konsiente ku e ta esun ku ta forma i eduká i Willem a konstatá ku mester hasi kambionan den nos enseñansa pa produsí profeshonalnan ku kalifikashonnan múltiple ku en futuro por ta mas kompetitivo.
Vakatura
Aktualmente tin un registro di hende ku ta buska trabou, pero no tin un lei ku ta obliga tur empresario pa registra su vakatura serka departamentu di labor i p’esei no por papia di un banko di vakatura. Tin entre 2500 pa 3000 persona inskribí, pero Philbert – Nieveld ta kálkula ku tin hopi mas tantu hende buskando trabou. Ta ora un empresa ta buska un hende djafó, e ora ei lei ta oblig’é pa registra e vakatura, i por trata di parehá e trahadó lokal kalifiká na e empresa. E empresario no ta obligá di tuma e persona, paso no ta un diktadura. “Si nos a kuminsá ninga hopi pèrmit, mirando ku tin yu di Kòrsou kalifiká ku por ehersé e trabou, i e petishon ta keda deklará inatmisibel”, Philbert – Nieveld a splika.
Outor Deya Mensche