Tin lus di kaya, por ehèmpel den Breedestraat, Handelskade i Hanchi’Snoa ku tin simannan kaba ku nan no ta sende – potrèt: Astrid Speckens
WILLEMSTAD – Klenku nobo, banki kant’i kaminda i kámara di seguridat den henter Punda, ku ta haña aparensia di un siudat moderno. Ta anochi so e idea aki no a kue pia ainda: pasobra hopi di e palunan di lus no ta funshoná partinan grandi di Punda ta den sukú.
Direktor di Downtown Management Organization (DMO) Raygen Zuiverloon ta na altura di e iluminashon limitá i ta bisa ku Punda tin un kaminda largu di bai ainda. “E problema ta ku no tin un plan di lus. E palunan di lus mester tabata forma parti di un sentro ku lus i ku edifisio òf bar ku lus. E ‘image’ i e sirkunstanshanan di Punda mester drecha.”
Pishi riba kaya
Aster Speckens ta arkitekto i for di dos luna e ta biba mei mei di Punda. Ora e palu di lus dilanti su kas a stòp di traha el a kuminsá paga tinu na e otro lusnan. “Mi tabata konta mas i mas lus dañá òf kibrá. Ku mi lista di 25 lus kibrá mi a yama Aqualectra, i mi ta keda yama nan pero despues di seis siman ainda no tin resultado, Mi lista ta bira mas i mas largu.
Segun Zuiverloon hopi a kambia último añanan. Gobièrnu ta koperá ku esnan envolví i tin akshon visibel – potrèt: Elisa Koek
Segun Speckens esaki no ke men ku no tin seguridat, ma tin be por parse asina. Hende ta para pishi riba kaya, huma un mariwana òf hasi guera na e lugánan skur. E kosnan aki no ta atraktivo pa turista pasobra lus tin un efekto sikológiko.
Deliberá
Aqualectra parse ta bon na altura di e palunan di lus defekto. Un trahadó ta konfirmá mesora ku tin hopi di nan kibra, no den Punda so. “E lampinan ta di DOW, pero nos mester drecha nan. Pasobra nos mester deliberá ku e kordinadó di DOW ta dura largu. Mi no sa si kon largu.”
Segun Zuiverloon di DMO hopi a kambia si último añanan. E konsientisashon di balor di Punda a krese. Gobièrnu ta koperá i tin akshon visibel. E kámaranan di seguridat ku a pone e siman aki ta un progreso grandi. “E ‘image’ di Punda tin un influensha riba yegada di horeca. Esaki ta trese kòntròl sosial i asina tur kos ta influensha kresementu di sentro di Punda. Pasobra hende gusta di ta den un fiesta ke men nos mester sòru pa tin un fiesta!”
Outor Elisa Koek