Chakal, un hoben dominikano, ta mustra kon personal di vigilansia di SDKK a maltrat’é
WILLEMSTAD – Batimentu i intimidashon di strañero na man di un grupo di wardadadó di prezu den e prizòn SDKK ta kustumber. Esei un strañero ku a sali liber kuminsamentu di e luna aki ta bisa.
El a saka potrèt i sine di ko-prezu maltratá. E violensia di e wardadónan semper ta sigui e mésun sistema. E violensia ta kontra strañero ku no ta tene nan mes na e ‘reglanan’ di e personal.
Riba 2 di febrüari seis wardadó di prezu a bati e surinameño hóben Denzel, sunú. Un wardadó a pensa ku el a huma mariwana ketu ketu den e barak. Ko-prezu ku ta tribi di bisa algu di e maltrato ta haña un kastigu ku spray.
Algun dia despues Chakal ta na turno, un hóben di Repúblika Dominikano. E no tin papel pa keda i e ta warda ekspulshon. Nan ta yama hende manera Denzel i Chakal indokumentá. Nan no ta den detenshon, pero den wardamentu di strañero i nan tin mas derechi ku nan kompañeronan kriminal. Asina por ehèmpel nan tin derecho pa hasi yamada di telefon entre nueb’or i dos or ku nan propio telefon selular.
Chakal ta graba e zundramentu
Ora un wardadó disidí banda di mitar di dos di buska e telefonnan Chakal ta rabia i e no ke duna su telefon bèk: pasobra no ta tempu ainda. E wardadó ta kuminsá zundra i ta menasá ku e lo kastigá e dominikano si e no keda ketu i duna su telefon. Chakal ta graba e zundramentu ku su telefon.
Nan ta kita e telefon mésora. Manisé e ta haña su telefon bèk pero nan a kita tur informashon. E grabashon no t’ei mas pero tur su potrètnan i sinenan tampoko. Chakal ta rabia mashá i e no por trankilisá.
Meskos ku ora di Denzel djis despues un pikòp ta para dilanti porta i seis hòmber den uniform di wardadó ta drenta paden. Nan ta kita Chakal su paña i sunú ta hib’é un otro kamber. Na kaminda e ta grita e otro prezunan ku nan ta bai batié.
Prezunan ta tende sla di moketa
E porta di e otro kamber ta sera i pa minütnan largu e prezunan ta tende sla di moketa i zonidu di batimentu i skòp.
Ora despues di mas o ménos un kuart’i ora e porta habri atrobe un otro wardadó ta bini ku mòp i feila i un bòter di produkto di limpia i ta limpia tur kos nèchi nèchi. Meskos ku e maltrato di Denzel no tin nada mas di mira.
Ta hiba Chakal e dormitorio. Su kara ta tur na sanger. Su lepnan i klèpnan di wowo ta hinchá. Di un ko-prezu e dominikano ta haña un telefon pa saka potrèt di su kara. Un dia despues e wardado di prezu hefe ta laga sa ku niun hende no ta haña nan telefon mas, ‘pasobra tòg no ta usa esaki pa yama’.
E testigu di e maltrato di Denzel i Chakal ta bisa ku ta e mesun wardadónan di prezu kada bia ta kometé e maltrato. E ta bisa ku tur wardadó di prezu ta na altura di e ‘tim di tortura’ aki. Hopi bia promé nan ta hasi un listramentu kaminda ta tira tur korchon, paña i otro artíkulo di e prezunan abou. Despues tur esnan presente mester bai e kamber di televishon. E víktima ta keda atras of nan ta hib’é un kamber apart, banda di e sala di drumi.
Hopi bia ta kita su paña, ta tir’é abou i ta dal e skòp e den su kara. E heridanan di Denzel i Chakal ta mes kaminda na na kurpa.
Outor Dick Drayer