Ta basha abate den hèmber i drùms pa mata e larvanan, den tanki di awa i rembak ta pone BTI òf piská. Den berpùt ta basha gasoil – potrèt: Elisa Koek

Ta basha abate den hèmber i drùms pa mata e larvanan, den tanki di awa i rembak ta pone BTI òf piská. Den berpùt ta basha gasoil – potrèt: Elisa Koek

WILLEMSTAD – Na Kòrsou tin 73 kaso konfirmá di zika segun epidemiólogo Izzy Gerstenbluth. Esakinan ta sifra di mas o ménos dos siman pasá. “Chèns ta grandi ku e kantidat aki entretantu a subi hopi mas”, e ta bisa.

Siman pasá World Health Organization a divulgá ku tin prueba sientífiko fuerte ku tin un relashon entre e viro di Zika i microsefalia i e síndroma di Guillain-Barré. E viro di zika, meskos ku chikunguña i dengue, ta transmití pa e sangura Aedis Aaegipti. GGZ ta trata di eradiká e lugánan kaminda e sanguranan ta brui pa asina evitá ku e viro ta plama.


Pa eradiká e lugánan di brui, e kontroladónan di GGZ (ántes GGD) ta pasa e kasnan. Un pa un nan ta chèk e kuránan pa lugá kaminda awa por para. “Nos ta topa hende ku no ta konsiente di e lugánan di brui, pero tin di nan sa masha bon kiko nan ta hasi pero kasi nan no tin kunes”, kontroladó di GGZ Haidette Vrutaal ta bisa.
GGZ tin seis kontroladó. Vrutaal i su kolega Bryan Gosepa diariamente ta inspektá sigur 25 kas. “Esakinan ta e kasnan kaminda nos por drenta”. Gosepa ta konta. “Nos ta pasa hopi mas kas.” Ora no tin hende na kas, nan ta laga un karta sperando ku e habitantenan ta yama pa un sita.

Kòntròl
Ta djis despues di mitar di nuebe ora Vrutaal i Gosepa para nan pikòp den Charo. Awe nan ta bishitá un akohida di mucha i e kasnan rònt di dje. Despues ku a laga nan drenta, nan ta inspektá e besindario rònt di e edifisio. Hèmber bashí, tayer di outo, pero tambe un tapa di pos kibrá i un baki di mata ku awa a keda para aden ta haña e marka ‘positivo’. “Esei ke men ku e por bira un kaminda pa brui, maske ku aworakí ainda no t’asina”, Gosepa ta splika.

Propio responsabilidat
Ta tira abate den drùms i hèmber pa mata e larvanan. Den e tankinan di awa i e rembaknan ta tira e supstansia biológiko BTI òf piska chikí ku ta kome e larvanan. Den e berpùtnan ta basha gasoil. “Kaba ta na e habitante mes. Nos ta bisa nan kiko ta e puntonan ku mester mehorá i si ta serio nos tin bin wak un biaha mas, pero nan mes mester hasié.”

Mayoria di hende ta reakshoná kariñosamente, ma no ta tur hende tin gana di haña konseho. Un habitante no ke laga nan drenta, un otro habitante ta rechasá Vrutaal su konseho. Vrutaal ta keda kordial pero e ta basha e sobránan di awa afó si. “Naturalmente hende ta rabia, pero tòg bo mester trata di splika nan ta kiko ta kiko”, e ta konta despues. Esaki ta e úniko manera pasobra nos mester hasi esaki huntu.”

Registrá
Ora nan sali Charo nan ta chèk e lista un bia mas. E kasnan kaminda a haña un lugá di brui ta haña un anotashon, e kasnan kaminda nan no por a drenta tambe i e kasnan ko no tin hende ta biba aden, i pasa e mensahe pa gobièrnu. Nunka nan ta tende algu di e dos último gruponan aki? “Nos ta spera si, pero por lo pronto nos ta djis nota i warda.”
Fin di yanuari a konstatá zika pa promé bia na Kòrsou i for di e tempu ei GGZ ta hiba un kampaña di konsientisashon via foyeto, propaganda na radio i social media.

Outor Elisa Koek