Xavier i Anne, habitante lokal, a kaba di kasa na Boneiru – Potrèt: Janita Monna
KRALENDIJK – Djárason Anne i Xavier a kasa. Nan ta e promé pareha homoseksual ku ta kasa na Boneiru. “Tabata amor na promé bista.”
Un par di dia promé ku kasamentu kas ta yen di hende. Xavier su famia, su mihó amiga i su testigu a kaba di yega di Venezuela. Su mama a kaba di sera konosí ku e mama di Anne.
E dos hòmbernan konosé otro un aña i mei. Anne tabata biba na Aruba. Bon mirá e tabata tin intenshon di muda pa Hulanda, ora ku su dunadó di trabou a ofres’é un trabou na Boneiru.
“Wow, I’m gonna marry this guy!”Xavier a pensa ora el a mira Anne drenta e restorant kaminda e tabata traha den kushina. Nan a traha un sita pa e siguiente dia. “Mes ora nos a konfia otro. Tabata amor na promé bista”, tur dos ta bisa.
Mi tin algu di konta
Xavier ku diesseis aña kaba tabata sa ku e ta gusta hòmber. E tabata biba na Venezuela ainda. “Hopi tempu mi tabata tin e sintimentu ku mi tabata hasi algu hopi malu. Pero ora mi ruman muhé a haña sa, el a haña ku ta OK. Mi tabatin masha miedu di konta mi mama. Un anochi ku mi tabata mira ‘Grey’s Anatomy’ huntu kuné di repente durante e propaganda ma bis’é: ‘Mi mester konta bo algu. Mi ta gay.” Despues el a sigui mira e programa. Bon mirá nos no a papia tokante di esaki nunka mas.”
Pa Anne tabata diferente E tabatin añanan kaba ta lucha. “Largu tempu mi a trata di enamorá di un mucha muhé. Pa biba un bida ‘normal’. Pero ora m’a hasi 27 aña m’a atmití na mi mes ku mi stima hòmber.
Aseptá
E hendenan rònt di nan – amigu, famia, kolega- a aseptá nan kompletamente. Pero nan ta konta tambe: Ora nos kana tene man riba kaya aki na Boneiru hopi bia hende ta grita nos. ‘Mariku stinki’ i sorto di kos asina. Nos ta trata di blòkia esaki. Ora e sosodé bo no por hasi nada.”
Nan a yega di eksperensiá tambe ku na un fiesta un hòmber a sali bai rabiá pasobra nan ta homo. “Si, esei si por poné mi bira razu”, Xavier ta bisa. “Mi no ta ni pidi un hòmber asina pa aseptá mi. Mi ke pa djis laga mi na pas. Hende ta kue nán problema, hasié nos problema.”
Segun Anne den enseñansa mester bini mas atenshon pa homoseksualidat. “Konsientisashon ta kuminsá serka e muchanan.”
Si
E kasamentu ta bira un selebrashon grandi, riba Seru Largu. “Ora m’a tende ku nos mester di pèrmit di iglesia katóliko pa por bisa otro ‘si’ serka e krus riba e seru, mi a haña un black-out”, Xavier ta bisa. “Mi a pensa ku nos por bien lubidá.” Pero esei a sali mihó di loke el a pensa.
Nan ta kontentu ku nan por kasa komo dos hòmber riba nan mes isla. Mes ora nan ta bisa tambe ku ta straño ku esaki no por tur kaminda: “Pasobra nos tur ta hende. Derecho igual pa un i tur.”
Outor Janita Monna