Mucha muhé te diesocho aña na estado ta haña akohida na Kas Bruder Pius – Potrèt: Elisa Koek
WILLEMSTAD – Di kada mil mucha muhé entre dieskuater i diesnuebe aña na Kòrsou, 34 ta mama. Asina e Instituto di Salubridat Públiko di Kòrsou (VIC) a kalkulá aña pasá. E porsentahe di mama tiner for di 2008 (3.5 porshento) apénas a baha.
Tin mama tiner ku ta masha felis i kontentu ku nan embaraso, pero ta sosodé mas tantu ku e no tabata planeá. E mucha muhénan ta kore e riesgo ku nan famia ta kore ku nan i na algun skol nan mester kita skol promé ku nan kaba.
Fundashon Guia i Forma ta duna e mucha muhénan akohida na Kas Bruder Pius. Despues e muchanan ta bai kas di nan mayornan bèk kaminda despues di seis luna di guia di e fundashon nan ta riba nan mes.
Myra di diesshete aña a sali na estado ku diessinku aña. El a muda bai Kas Bruder Pius te dia ku el a haña si yu muhé. Pronto despues e mester a bai kas bèk. E no a mira e tata di su yu mas. “E tabata trata mi bon i nos tabata hasi hopi kos huntu, pero e no tabata ke yu. Ora mi a kont’é ku mi ta na estado el a rabia. El a haña ku mi mester a evitá esaki.”
No tin antikonsepshon
Myra no tabata usa antikonsepshon i aworaki, despues di su embaraso, tambe e tin relashon sin protekshon ku su partner. Segun Adriana Boersma, ku a investigá mama tiner na entre otro Kòrsou, uso di antikonsepshon ainda ta un problema. “E kousa mas grandi di embaraso no deseá ta no usa antikonsepshon konfiabel. Tin mucha muhé ta us’é pero no strukturalmente”, por lesa den su investigashon.
Segun Boersma informashon seksual, pero tambe legalisashon di aborto ta sòru pa tin ménos embaraso no deseá i mihó kuido pa hende muhé. Na 2015 por lo ménos sinku mucha a keda hospitalisá despues ku nan a tuma píldora di aborto ku nan a haña ilegalmente. “E kantidat aki probablemente ta mas haltu pero no a registr’é.”
Lugá pa un tempu limitá
Davidson Mourillon ta presidente di Fundashon Guia i Forma. Kas Bruder Pius pa akohida di tiner na estado te 18 aña ta un di e fasilidatnan ku ta kai bou di e fundashon. E akohida ta limtá na un sierto tempu. E fundashon ta dependé di supsidia di gobièrnu, pero pa un gran parti di donashon tambe. “Si ta berdaderamente nesesario, tin bia nos ta logra prolongá e akohida ku un donashon. Pero normalmente nos mester laga nan bai.”
E guia adekuá
E mamanan hóben tin bia por akudí na bibamentu bou di guia na Bramendiweg. Lástimamente e mayoria despues ku e yu nase ta bai kas di nan mayornan bèk, tin bia bou di sirkunstanshanan deplorabel. “Nos ta guia nan seis luna mas, di un distansha, i despues nos mester laga nan bai. Ta difísil pasobra nos sa kiko mester pa duna un mucha muhé asina e guia i informashon adekuá.”
Outor Elisa Koek