James Murray tabata sa ku e lo no biba pa tende e sentensia, el a fayesé na 2014 – potrèt: 24ora
WILLEMSTAD – Hulanda ta kulpabel di negligensha den e kaso James Murray. E hòmber ku na 1979 na Kòrsou a mata Darly Lai di seis aña di edat a keda será 33 aña sin niun sorto di bista realista ku tin un chèns ku e lo sali liber un dia. Asina Korte Oropeo pa Derecho Humano (EHRM) a husga awe.
Den tur e añanan ku Murray tabata será nunka no a trat’é pa su personalidat antisosial, un enfermedat sikológiko.
E kaso dilanti e instansia oropeo di korte mas haltu espesialmente tabata trata e deber di gobièrnu pa duna un hende kondená pa un sentensia largu den prizòn i ku tin un defekto síkiko, un trato sikiátriko òf sikológiko adekuá.
E sentensia, segun Murray su abogado Claudia Reijntjes-Wendenburg, lo tin konsekuensia grandi pa Hulanda Karibense i pa Hulanda mes.
Efekto
“Pa e islanan ta konta ku nan ta kana dilanti riba reglanan hulandes pasobra einan a inkorporá un posibilidat pa komprobá pa hende ku kastigu di bida largu den lei. Esaki ainda no ta e kaso na Hulanda; e proposishon di lei si t’ei. Pero EHRM a establesé ku solamente e posibilidat di komprobá no ta sufisiente”, Reijntjes Wendenburg ta bisa. “Ta un posibilidat hurídiko ku no tin un efekto berdadero si no ofresé e persona kondená e posibilidat di resosialisashon durante su detenshon.”
Kaba lei riba e islanan tampoko no ta ofresé e posibilidat aki i no tin un areglo pa hende ku kastigu di bida largu e ora ei haña un trato adekuá na Hulanda.
Derecho riba trato
“E sentensia ta nifiká ku hende ku kastigu di bida largu for di kuminsamentu di e detenshon mester haña e posibilidat pa traha na nan mes i pa nan por resosialisá na algun momentu. Esta: nan tin derecho riba un trato sikiátriko.”
No tin un klínika di tbs òf un instituto sikiátriko forénsiko na e islanan. Miéntras ku for di añanan sinkuenta tin un lei pa introdusí ponementu na disposishon (tbs) na Kòrsou.
Via Reijntjes-Wendenburg Murray a entregá un keho na korte oropeo ku e asina yamá grote kamer ku diessinku wes a trata. Aki a referí na artíkulo 3 di e Tratado Oropeo pa Derecho Humano ku ta trata e prohibishon di tortura.
Grasia
Murray tabata será for di 1999 den Korrektie Instituut Aruba (KIA), te ora ku na mart di 2014 a dun’e grasia pasobra e tabatin un enfermedat terminal. El a muri na novèmber di 2004. Su ruman muhé i su yu hòmber a sigui prosedé.
Na 1980 a kondená Murray na kastigu di bida largu pa e asesinato di Darly Lai, ku el a mata pasobra e mucha muhé su tanta a kibra e relashon ku Murray. E sikiatra den su rapòrt e tempu ei a skibi ku Murray ta ‘narsista, atrasá i infantil’ i el a rekomendá trato ekstensivo.
Libertat kondishonal
Den e kódigo penal nobo ku for di 2010 a drenta na vigor na Kòrsou, banda di e medida di tbs a inkorporá tambe e posibilidat di libertat kondishonal pa esnan ku kastigu di bida largu.
Na 2011 Murray su kaso a bini dilanti, e promé un bou di e lei nobo aki. A rechasá su petishon entre otro pasobra nunka e no a haña tratamentu, Korte na Kòrsou a husga ku ku esaki ‘e chèns di residivismo a keda influensiá negativamente i un eventual reintegrashon den komunidat lo ta difísil’.
Segun Reijntjes-Wendenburg Murray tabata sa ku e lo no alkansá e sentensia. “Pero el a gusta e idea ku e por a hasi un diferensha pa un otro hende.”Otronan segun e abogado por benefisiá di e sentensia aki, pasobra awor nan por kleim ku mester hasi algu ku nan den ramo di tratamentu i resosialisashon.
‘Human waste’
E konsiderashon di mas bunita di EHRM ta pará den e konklushon. Esta: ‘Justice came too late for Mr. Murray, no prisoner deserves to be treated like forgotten human waste’”, Reijntjes ta konkluí.
Outor Leoni Leidel-Schenk