Lisette Gomes ta entrega manifiesto na vice-presidente di Staten Chris Dammers. Foto: Ariën Rasmijn
ORANJESTAD — Emocionnan a subi halto un biaha mas dilanti Bestuurskantoor ora cu un grupo di protesta a entrega un manifiesto na parlamento y gobierno den cual nan ta exigi mas sosten y accion concreto den casonan di abuso sexual di menor.
Un grupo di entre 150 y 200 persona a participa ayera den un marcha di protesta pa trece atencion na e problematica rond abuso sexual di mucha. E protesta a wordo organisa pa Fundacion Lisette Gomes: Stop Abuso Sexual di Mucha.
Ariën Rasmijn combersando cu Lisette Gomes
Motibo ta inquietud den comunidad despues cu a sali na cla cu a dura un aña pa polis y Ministerio Publico detene un persona cu tabata wordo sospecha di abuso sexual di menor. Despues cu e lo no a haya oiso di instancianan gubernamental, e tata a cuminsa vandalisa edificionan pa yama atencion di publico. Recientemente a detene e persona cu lo a comete e actonan di abuso.
Bisti na preto
Hopi di e participantenan tabata bisti na preto y cu velonan riba nan cara como simbolo di luto. Prome a entrega un manifiesto na parlamento. Eynan vice-presidente di parlamento Chris Dammers a tuma e documento y a remarca entre otro cu den hopi caso di abuso sexual di menor e famianan mes ta tapa e sucedido. Esaki sinembargo no a cay den bon tera serca e manifestantenan y e ambiente na entrada di parlamento a bira como tal cu Dammers y e otro miembronan di fraccion di AVP cu tabata presente a drenta bek den edificio pa nan mesun siguridad.
‘Instancianan ta fayando’
Despues a sigui pa Bestuurskantoor, na unda minister di Husticia Arthur Dowerrs y minister di Asuntonan Social Paul Croes a ricibi e multitud. Dowers di su banda a declara cu hopi di loke a exigi den un otro manifiesto cu a wordo entrega e luna aki ya ta wordo cumpli cune. Minister Croes sinembargo a reitera loke el a declara caba poco dia pasa cu instancianan cu ta atende cu casonan di abuso sexual di menor no ta traha optimalmente.
Exigencianan
Den e manifiesto ta urgi gobierno pa introduci un Kinderombudsman, castigonan minimo den caso nan di abuso sexual di menor y institui un commission cu lo mester trece recomendacionnan comparabel cu e asina yama ‘Actieplan Kinderen Veilig’ cu a wordo introduci na Hulanda na 2013. Plan aki lo mester wordo introduci no mas tarda cu 1 di januari 2017.
Respuesta
E manifestantenan a duna gobierno 30 dia pa bin cu un contesta pa cu e exigencianan. Sinembargo den oranan di anochi caba, Lisette Gomes a duna duna di conoce na Noticia Cla cu ya caba el a haya un carta di conseho di minister, bisando cu nan lo reuni cune, posiblemente otro siman caba. A pesar di e respuesta di ministernan, awemainta a habri cu noticia cu porta di entrada di parlamento a wordo kibra.
Autor: Ariën Rasmijn