Ta keda amplia SEA na Gouverneur Laufferschool i otro skol tambe a hasi petishon – Potrèt: SEA
WILLEMSTAD – Kasi 33 porshento di hóben entre 15 pa 24 aña ta kita skol sin haña nan diploma. Ochenta porshento di e hóbennan aki ku ta kita skol ta alumno di vsbo.
“E sistema regular di enseñansa hopi bia no ta funshoná pa alumno di vsbo”, Rob de Waal ta bisa. Huntu ku Reineke Keijzers-Bouma el a kaba di sera un pilot di e proyekto di Students’ Environmental Awareness (SEA): un inisiativa kaminda mucha ta haña lès pafó di skol.
Ernesto Daal (17) dos aña pasa a stòp ku skol. E no tabata mira mas ki sentido tabatin di studia i awor e ta yuda un konosí di dje den un garashi. “Berdaderamente mi no tabata siña nada na skol i mi no tabata sa kiko mi ke bira. Ya, den horeka òf algu asina, pero esei no ta nada pa mi. Awor mi ta traha ku motor i mi ta kere ku mi ta bai dilanti.”
Sin perspektiva di futuro
For di un investigashon di Unicef na 2013 a sali ku hopi alumno di skol ta kita skol pa motibu di pobresa: nan ke un bon trabou pa gana hopi plaka. Hóbennan ta kere ku nan no por logra esaki ku vsbo. “Hopi bia nan no tin un idea kiko e posibilidatnan ta despues di vsbo”, Van Waal ta konta. “Via SEA nos ta hiba e alumnonan den e kampo di trabou i asina nos ta splika nan e relashon ku teoria.”
Segun De Waal e alumnonan tin bia ta keda sorpresá ora bo konta ku despues nan por bai traha den kuido òf den mundu marítimo òf den e ramo di evento: “Nan ta kere ku nan no por logra nada, pasobra ku un diploma di vsbo probablemente bo no por bira dòkter òf abogado un be. Pero via vsbo tambe por haña trabou interesante i bon.”
Kombinashon di materia
Último dos aña a ‘tèst’ e proyekto na entre otro Gouverneur Laufferschool. Alumnonan a bishitá haf, pero tambe Malpais i atrakshon turístiko. “Asina e alumnonan ta haña interes den e loke ku nan ta siña i nan ta deskubrí ku nan por siña bon pero na un otro manera.”
Lisette Mauricia ta dosente biologia na Gouverneur Laufferschool. E ta konta ku tin alumno ku difikultat pa siña materia for di kabes. “Nan no por konsentrá largu i nan ta fada lihé. Nan no por siña kareda di informashon for di kabes, nan mester di kos práktiko, pero no tin basta material di lès pa esaki.”
E ta kontentu ku e oumento den forma di e lèsnan di SEA. Esaki ta trese e materia mas serka. “Por ehèmpel nos ta traha un kombinashon di Biologia, Ekonomia i Siensia Sosial i nan ta siña ku ehèmpelnan di bida. E alumnonan di e klasnan ku ainda no ta haña lès pafó di skol awor asta ta pidi pa nan haña esaki. Nan ke partisipá.”
Importante
Mauricia no sa si SEA ta e solushon pa esnan ku ta kita skol, pero den su klasnan e tin un influensha positivo sigur. Por ta parti di e solushon: e materia ta mas kla i e alumnonan ta deskubrí ku den un trato ‘regular’ kisas nan ta lubidá di mira nan mes talentonan. “Esaki so ya kaba ta importante pa nan sintimentu di nan responsabilidat i balor propio.”
Ta sigui ampliá SEA na Gouverneur Laufferschool i otro skolnan tambe a pidi. Via spònser i envolvimentu di kompanianan den e kampo di empleo di e alumno di vsbo, SEA ta spera di ampliá e proyekto mas aleu riba Kòrsou.
Outor Elisa Koek