E gastu mas grandi ta e operashon di e asilo, unda ta yuda e animalnan ku ta kaná los riba kaya – Potrét: Deya Mensche
WILLEMSTAD – Dia 14 i 29 di mei próksimo, plataforma kontra abusu di animal SADA, huntu ku Stichting Dierenbescherming Curaçao, ta inisiá e proyekto piloto di kastrashon i sterilisashon boluntario den diferente bario di Kòrsou.
Diferente organisashonnan ku ta traha pa derechonan di bestia a uni forsa pa realisá e proyekto importante akí. E ophetivo ta pa redusí e poblashon di kachó di kaya riba nos isla, unda ta purba di sterilisá mas tantu kachó posibel.
Resultado duradero
Según Gregory Berry, presidente di Stichting Dierenbescherming Curaçao, mester ripití e kampaña akí sigur kuater biaha pa aña pa esaki duna resultado duradero. Tambe Stichting Dierenbescherming Curaçao ta apelá na pueblo di Kòrsou pa sostené e kampaña akí finansieramente, paso kada operashon ta kosta un promedio di 100 florin pa kachó. “Si nos tur kontribuí, maske ta ku un montante chikí, nos por yuda un gran kantidat di kachó”, Berry a splika.
Problema finansiero
Pa falta fondo, e fundashon di 65 aña pa basta tempu a enfrenta problema finansiero. Despues ku e bestür anterior a baha, Berry i su tim a tuma e batuta over na mart 2015. “Nos a hasí un esfuerso pa rekoudá mas fondo i invertí den inisiativanan ku ta tene e fundashon na bida”, ela splika. “Esaki a duna fruta i pa promé biaha den shete aña, nos a sera aña sin perdida”. E fundashon a organisá un konsierto, un kaminata pa bestia i a aserka diferente negoshinan grandi pa bira ‘Goodwill Partner’ dor di kumpra un akshon.
Sírkulo visioso
E gastu mas grandi ta e operashon di e asilo, unda ta yuda e animalnan ku ta kaná los riba kaya. Alabes tin gastunan mara na e partí edukativo, unda ta realisá varios kampañanan di konsientisashon. “Si bo no eduká, e asilo ta keda yena ku bestia i esaki ta kreá un sírkulo visioso. Aktualmente nos tin kasi 96 animal”, Berry a kontinuá.
Tambe Berry ke pone un inspektor di keho nobo, pa kontrolá e bestianan ku a ser adopta. “Nos mester tin mas mihó kontrol riba e hendenan, i si nan ta kuida e animal ku nan a adopta”. Según Berry, e problema di más grandi di nos komunidat ta e manera ku hende ta mira un bestia. “Si tin desaroyo den e mentalidat, unda awó hopi hende ta tuma un bestia komo kompaño i paso genuinamente gusta bestia”, ela splika.
Konteo general
Resientemente, e fundashon a hasí un konteo di bestia general, unda aworakí e ta hinkando tur informashon den un database, kual e fundashon ta spera di presenta pronto. Durante di e konteo, a partí Kòrsou den zona, unda por a determina kuantu kachó di kaya tin relashoná na e respektivo barionan. Tambe a inventarisá e sekso di e kachónan i si nan ta sterilisá of no.
Na juni 2015, Berry a bishitá minister Whiteman, pa splik’e e importansia di e asilo i kon gobièrnu por sostené su aktividatnan. Whiteman a aparta 100 mil florin di gobièrnu pa e fundashon, i na desèmber Berry a komprondé di e sekretario general ku e sèn ta na kaminda. “Ainda nos a haña e sèn riba nos kuenta, pero nos ta keda positivo”, Berry a añadi. Lamentablemente e kontribushon gubernamental akí no ta algu struktural, i sin esaki, e fundashon no por plania i implementa un strategia efektivo.
Permit di Kachó
“Nos a traha un konsepto di lei pa introdusí un pèrmit di kachó, unda e bestia mester ta sterilisá i bakuna, i mester tin un chip di identifikashon pa asina regula e populashon di bestia”, Berry a konkluí.
Outor Deya Mensche