Clyde van Putten ta papia ku e demostradónan presente. Potrèt: Janita Monna
KRALENDIJK – Un solo skèrpi ku un krans rònt di dje ta sali riba Boneiru durante e protesta: nunka Aubert Wiels no a mira algu asina i e ta impreshoná. E ruman hòmber di e polítiko asesiná Helmin Wiels djaluna mèrdia ta na Boneiru pa sostené James Finies i su lucha kontra Hulanda.
Finies i su partidarionan di Nos Ke Boneiru Bèk tur djaluna mèrdia ta protestá dilanti di e edifisio di Rijksdienst Caribisch Nederland. E bia aki el a haña sosten di su ko-luchadónan di Kòrsou i Statia Aubert Wiels, Clyde van Putten i Charles Woodley.
65 porshento di pueblo bonerianu no ta di akuerdo ku e manera ku aktualmente ta ehekutá e laso direkto ku Hulanda. Pero segun Finies ta manera Den Haag no ta tende esaki. Wiels ta di akuerdo kuné: “Ta Hulanda ta pone regla aki. Esei no ta bon. Boneiru mester ta liber meskos ku Kòrsou. Ta ruman nos ta. Nos mester sostené otro.”
Trinta di mei
E siman aki e manifestashon a kai riba 30 di mei. Riba e dia ei 47 aña pasá tabatin disturbio na Kòrsou despues di wèlganan di trahadónan di Shell, bou di direkshon di Wilson ‘Papa’ Godett. Un parti di sentro di Punda i Otrobanda a kima i a kai dos morto. Ta pa e motibu aki tambe ku polítikonan bonerianu tin miedu di disturbio.
Gezaghebber suplente Evelina Betancourt-Anthony den un karta habrí ta apelá pa no kopia asuntunan di pasado, sino pa buska diálogo. “Den e interkambio di pensamentu nos ta haña e kaminda pa alkansá tur loke nos ke, kontal ku esaki ta produktivo i den interes di un i tur”, el a laga sa.
Algun polis tabata supervisá e manifestadónan ku a akudí na kantidatnan grandi. Nan ta hopi mas ku riba e djalunanan anterior, pero na final ta un bòrchi grandi ku e lema ‘Papa Godett, we’ll never forget’ ta konmemorá 30 di mei.
Referèndem
Bou di e presentenan, banda di Aubert Wiels, tabatin e polítikonan di Statia Clyde van Putten i Charles Woodley di e partido di gobièrnu Progressive Labour Party (PLP). Meskos ku na desèmber na Boneiru, Sint Eustatius na 2014 ku un referèndem a sondia opinion di pueblo tokante e struktura estatal aktual. A sali ku na Statia tambe e malkontentu bou di pueblo ta grandi.
“Aktualmente ta pió ku bou di Antia Hulandes”, Van Putten ta bisa. Mi a kaba di kore pasa den Kralendijk i tabata manera ta den un pueblo hulandes mi tabata kore. Loke a sobra ainda di Boneiru mester keda pa bonerianunan.”
Koperashon
Van Putten no ke pa riba su isla nombra hulandes mas den posishon importante. “PLP i Nos Ke Boneiru Bek di Finies awor lo traha huntu”, Van Putten ta bisa. “No ta un lucha fásil, pero nos ta determinado pa lucha pa libertat di nos pueblo.”
Outor Janita Monna