Etty i Gerda serka e kas kimá di Jamel Lomp na Tera Pretu – Potrèt: Dick Drayer
WILLEMSTAD – “E islanan di Antia anterior ta muchu chikitu pa nan mes lanta un klínika ‘tbs’ òf un prizòn hubenil.” Asina bosero Norman Serphos di Ministerio Públiko ta bisa.
Serphos ta reakshoná riba e intrankilidat ku a surgi na Bandabou despues ku Jamel Lomp a sali liber; un hòmber sikótiko ku segun wes mester di un aña mas di tratamentu. Pero niun hende na Kòrsou no ke trat’é i awor e ta liber i bèk na Tera Pretu.
E bario ta babuká. “I espesialmente ku miedu”, Etty Akasio ta bisa. “Nos tin miedu pasobra e hòmber aki ta kapas di hasi tur kos.”E por sa pasobra Jamel a ataká su kasá Ashwin ku machete na desèmber. “Pasobra el a mira via un satélite ku mi kasá a hòrta kos for di su outo. Jamel ta loko.”
Aviso
E ta pará ku un otro bisiña, Gerda Brands, serka e kas kimá di Jamel. “Dos siman pasá bario a kima e kas pa duna e bisiña sikótiko un aviso”, e ta bisa. Gerda a kaba di tene un korespondensia amplio ku Ministerio Públiko pa evitá ku Jamel ta bini bèk den komunidat sin tratamentu. A rekurí na Defensor di pueblo tambe, te ainda sin resultado.
“El a kaba di sinta su kastigu i p’esei nos no por ten’é mas largu”, Norman Serphos ta bisa. “E último parti di su kastigu, atmishon den un hòspital sikiátriko, ta bou di guia di Reclassering. Nan a ofres’é na klínika Capriles, e úniko instansha ku por trat’é na Kòrsou. I ta einan e problema ta sinta, segun Serphos. “Capriles no ke atmitié pasobra e ta muchu peligroso.”
Seguridat
“Nos tin un problema, sigur nos tin un problema”, direktor Waldi Oostburg di klínika Capriles ta atmití. “No ta ku nos no ke trat’é, ta trata di seguridat. Nos ta un klínika sikiátriko general, nos no ta un klínika ‘tbs’ òf un klínika forénsiko. Nos no ta ekipá pa esaki.”
“Ministerio Públiko ta pará ku lomba kontra muraya. “Nos no por ten’é, no tin título p’esaki. Capriles no tin deber di atmishon, nan por nenga hende pa motibunan di seguridat. I Reclassering no por guia nada si no atmitié.”
Konsterná
Gerda ta sakudí kabes: “Gobièrnu a laga nos na kaya masha tantu mes. Mi ta masha desapuntá. Mi ta konsterná pa e estupides di esaki.” E bario tampoko no ta komprondé pakiko ta duna un kastigu si, pero no ta ehekut’é.
Serphos ta komprondé esaki pero Kòrsou ta muchu chikitu i tin muchu poko kaso asina pa krea un infrastruktura pa nan. P’esei for di OM a proponé pa regla esaki federalmente. Huntu ku islanan BES, Sint Maarten i Aruba. Un klínika ‘tbs’ na Kòrsou, un prizòn hubenil na Sint Maarten i – mi ta menta algu – un prizòn sikiátriko na Boneiru. Ta solamente si nos koperá nos por solushoná e problema aki.”
Outor Dick Drayer