Presidente di Staten Mike Franco (Kòrsou) ta firma e lista di palabrashonnan di IPKO – potrèt: Pieter Hofmann
DEN HAAG – E parlamentonan di e paisnan den Reino ke pa husga tur dos proposishon di lei pa un areglo di disputa riba e tres puntonan di salida ku a kumbiní anteriormente. Esaki ta enserá ku un órgano independiente ta dikta sentensia obligatorio tokante disputanan estriktamente hurídiko den Reino.
Pa esaki logra e delegashonnan di e parlamentonan hulandes, kurasoleño, arubano i di Sint Maarten awe a firma un deklarashon konhuntamente pa finalisá IPKO (E deliberashonnan interparlamentario di Reino).
Pieter Hofmann a kombersá ku Rene Herdé i Mike Franco
Aktualmente tin dos proposishon di lei ku tur dos ta suministrá un areglo di disputa. Un ta bini di e minister di Asuntunan Interior i Relashonnan den Reino (BZK) Ronald Plasterk. E otro proposishon ta di Aruba , Kòrsou i Sint Maarten.
E diferensha di mas importante ta ku e proposishon di Plasterk ta buska veredikto no obligatorio di Konseho di Estado. Pero e delegashonnan karibense no por bai di akuerdo ku esaki. René Herdé (Aruba) ta rekonosé ku e proposishonnan ta keda leu for di otro. “Pero aña pasá nos a hasi un paso importante. Nos a establesé e eksigensianan ku e areglo di disputa mester kumpli kuné.”
Ainda no ta kla kiko lo sosodé despues ku komprobá tur dos proposishon di lei na e tres puntonan di salida. Kada pais ta asemblá un komishon chikí pa asina yega na un akuerdo.
Presidente Jeroen Recourt ta firma e lista di palabrashonnan di IPKO – potrèt: Pieter Hofmann
Reakshon
Mike Franco ta papia di ‘pasonan chikí den e bon direkshon’. Tòg ta reina un sintimentu tambe ku e realisashon di e areglo di disputa ta bai muchu poko poko. Presidente Jeroen Recourt ora a puntr’é si e ta desapuntá òf optimista a kontesta: “Tur dos. Aparentemente e kos ta bai mas difísil i mas poko poko ku a kere. Pero mi ta sinti si e disposishon pa wak e kos.”
Promé ku fin di e aña aki tin elekshon na Kòrsou i Sint Maarten. Niun di e dos delegashonnan no ta ferwagt ku esaki lo tin influensha riba e progreso di e areglo di disputa. Franco: “Mi no ta kere. E puntonan di bista manera a akordá nan aworakí pa e kuater paisnan ta asina reglá ku un parlamento kambiá no por kambia esaki.”
Outor Pieter Hofmann