Legislashon i Asuntunan Hurídiko na Fort Amsterdam | Potrètnan: Dick Drayer
WILLEMSTAD – Despues di kuater aña di ousensia Kòrsou tòg ta haña un Konseho pa Salubridat Públiko. No mester di un lei nobo p’esaki. Añanan largu huristanan na e departamentu di Legislashon i Asuntunan Hurídiko (WJZ) di e Ministerio General a kere ku e legislashon bieu di promé ku 2010 tabata hasi un Konseho nobo imposibel. Pero esei no t’asina.
Ministerio di Salubridat tabata traha huntu ku e huristanan di gobièrnu na un lei nobo, pero segun direktor di sektor Norberto Ribeiro di WJZ pa motibunan no muchu kla esaki a keda pega den e mulina atministrativo. “Meskos ku mas legislashon sa hasi”, dòkter di kas Rob Spong ta añadí.
Na nòmber di e Asosiashon di Dòkter di Kas e lo a sinta den e Konseho nobo na 2012. Pero nunka esaki no a sosodé. Meskos ku fisioterapista Marieke de Windt. E tambe a haña un invitashon pa sinta den e Konseho, el a manda su CV i despues e no a tende nada mas. E ta suponé ku gobièrnu no tabata ke un Konseho, pasobra esaki por ta krítiko. “Pero mi no sa sigur.”
Ashley Duits supuestamente ta bai konsehá gobièrnu di nobo tokante e Konseho pa Salubridat Públiko
Lista negativo
A pidi Ashley Duits, e presidente anterior, ora el a baha pa prepará un direktiva nobo. “Pero den e kambio di Antia Hulandes pa pais Kòrsou a pone e lei konserní riba e lista negativo. Nos no sa pakiko. Esei tabata ke men ku tabatin un inklaridat hurídiko tokante legitimashon di e Konseho.”
Esaki a stòp durante un kaso den korte ku Pain Clinic a entamá. Den e kaso ei a sali na kla ku sierto entidat a mantené un státùs legal despues di 2010. Norberto Ribeiro: Ësaki ta un bunita tool pa nos start di nobo ku e Konseho. Awor ta minister di Salubridat Públiko ta na turno.”
Komishon temporario
“Di bèrdè mi a haña konseho di hurista di e pais pa aktivá e Konseho atrobe”, Minister Siegfried Victorina ta bisa. “Mester nombra hende. Mi ta bai instalá un komishon temporario ku ta bai organisá esaki. Probablemente lo mi aserká hende di e Konseho bieu pa sinta aden, pasobra nan tin eksperensia.”
Outor Dick Drayer