Minister di BZK Ronald Plasterk
DEN HAAG – E frakshonnan di Tweede Kamer di PvdA, SP, VVD, D66 i CDA ke pa gabinete mira mas tantu kiko e islanan BES por hasi independientemente. Esaki a bisa awe tardi durante un deliberashon di nota tokante Hulanda Karibense.
Minister Ronald Plasterk di Asuntunan Interior i Relashonnan den Reino (BZK) ke kambia poko na e struktura aktual di gobièrnu. E ta haña ku e islanan den e maneho aktual por hasi sufisiente eskoho nan mes. “Nos no ta bai krea un kontroversia kaminda no tin.”
Mínimo sosial
Plasterk ta pone hopi énfasis riba poder atkisitivo, kombatimentu di pobresa i e nivel di previshonnan sosial. Por ehèmpel ministerio di Asuntunan Sosial ta bai introdusí un mínimo sosial. Poko poko lo subi ònderstant pa e nivel ei.
Roelof van Laar (PvdA): “Ta un bon paso pero no ta e situashon final.” Van Laar ta bisa ku un suèldo mensual ku por biba di dje na Hulanda Karibense ta mas o ménos 1100 dòler. E suèldo mínimo aktual ta 800 dòler ke men e no ta sufisiente. Ònderstant aktualmente ta hopi mas abou: mas o ménos 200 dòler pa luna.
Nivel di previshonnan sosial
Andre Bosman (VVD) i Van Laar ta klèsh duru tokante e nivel di previshonnan sosial. E miembro di VVD ta enfatisá ku e previshonnan sosial mester ta adaptá na e region. Van Laar ta puntra sínikamente si ta Venezuela mester tuma komo ehèmpel pa reinan largu dilanti pakusnan òf Cuba komo ehèmpel pa midi demokrasia.
Bosman: “E punto ta, nos no mester hasi Hulanda Karibense Hulanda.” Van Laar: “Ta te ora trata di entrada VVD ta bisa esaki.” Riba otro tereno di maneho segun e miembro di PvdA hustamente a trata di hasi Hulanda Karibense un pida di Hulanda.
Oumentá kompensashon pa yu
Van Laar ke oumentá e kompensashon pa yu na 2017 di 38 pa 150 dòler. Esei lo kosta 6 mion euro pa aña. “Esei ta parse un paso grandi, pero na Hulanda esaki ta normal.” E ta haña ku for di 10-10-’10 gabinete a hasi muchu poko pa famianan ku yu.
E minister tin opheshon grandi kontra e proposishon pa motibu di un bùdjèt chikí. E no ke kòrta e plaka di e tres ministerionan di mas ‘grandi’ na Hulanda Karibense (Enseñansa, Salubridat Públiko i Seguridat i Hustisia).
Outor Pieter Hofmann