“Espesialmente pa funshon hbo ta difísil pa haña kandidato adekuá na Bpneiru”, John Soliano, direktor di Bonaire Holding Maatschappij (BHM) ta bisa – potrèt: Janita Monna
KRALENDIJK – Hóbennan ku a kaba di studia, binidero di e islanan anterior di Antia Hulandes, tin gana di bai nan isla bèk. Esaki a sali for di un investigashon resien hasí, bou di òrdu di ministerio di Asuntunan Sosial i Relashonnan den Reino (BZK). Pa hasi e bolbementu bèk atraktivo, algun kompania bonerianu ta trahando un programa di trainee.
Segun e investigashon, ku PBLQ ta hasi, 69 porshento di e mas ku 400 ku a interogá, lo ke bai nan isla natal bèk. Bek serka famia, e klima i tambe: kontribuí na desaroyo di e isla.
Koperashon entre e kompanianan
“Masha aña e gritu pa buska bonerianu hóben bon studiá bek pa e isla ta zona”, John Soliano, Direktor di Bonaire Holding Maatschappij (BHM) ta bisa. “Awor nos no ker a warda mas. Espesialmente pa funshon hbo ta difísil pa haña kandidato adekuá na Boneiru,” Soliano ta bisa. “Loke sí ta pasa ta ku kompanianan ta kita bon trahadó for di otro. Esei ta solushoná e problema di esun kompania ei si, pero no di e isla.”
P’esei BHM, huntu ku Ban Boneiru Bèk i OCAN, a pone algun kompania bonerianu rònt di mesa. E meta di e kombersashon ei: pa lanta un programa di trainee pa hende ku resientemente a kaba di studia. “Dos empresá filial di BHM – Telbo i Selibon – , Web, Bonaire International Airport i hòspital Fundashon Mariadal, tur ta interesá pa partisipá na un programa asina. Nos ke atraé esnan ku a kaba di studia pa dos aña. Den e dos aña nan ei nan por haña eksperensia di trabou. Banda di esaki nan ta haña training adishonal i guia personal.
Mantené balansa
Pa manda buska yu di tera ku edukashon haltu bèk – ‘tur hende ku a lanta den e region i ku ta sinti su mes liá na dje’, segun Soliano – ta bon pa e balansa den komunidat. “E relashon entre hende ku a lanta aki i hende djafó mester ta balansá.
Ademas e chèns ku e yunan di e islanan finalmente lo keda ta mas grandi. Esei ke men ku lo mantené sabiduria, i asina bo por lanta un komunidat duradero. Pasobra un komunidat kaminda tin poko kontinuidat den edifikashon di konosementu i eksperensha, ta afektá e abilidat pa yuda su mes.”
Soliano mes tambe ta un “bonerianu ku a bini bèk’. “Ora m’a sali pa Hulanda pa mi studia mi tabata sa ku mi ker a bini bèk mesora ku mi a kaba di studia. Mi tambe ta ‘deeply rooted’”,e ta bisa ku un kinipí di wowo pa e título di e investigashon.
Di su klas di havo di ántes aworakí tin sigur diesdos hende ta biba na Boneiru. “E laso ku e isla natal ta fuerte, esei ta sali for di e investigashon. Si bo lanta aki i bo ke sigui studia despues di enseñansa sekundario, bo ta haña bo ta bandoná e isla. Mi ta kere esei tambe ta hunga un ròl den e urgensha di hopi hende pa bini bèk.”
Krea ekspetativa real
Ta importante si pa mustra e hóbennan ekspetativa real di traha i biba na Boneiru. “Nos lo yuda ku e preparashonnan i únabes nan yega Boneiru tin un hende ku lo yuda nan pia kue tera.
Outor Janita Monna