Partidarionan a hisa bandera despues ku na Venezuela gobièrnu a firma e kòntrakt di re-apertura di refineria – Potrèt: Sharina Henriquez
ORANJESTAD – E reakshonnan na Aruba ta mikstp pa loke ta e firmamentu di e kòntrakt entre gobièrnu di Aruba i kompania filial Citgo di e kompania di zeta di estado venezolano PdVSA. E firmamentu a tuma lugá djabièrnè na Caracas.
Arubanonan por a sigui e firmamentu bibu via e emisora lokal. Espesialmente e imágen di nan propio promé minister Mike Eman ku e presidente venesolano Nicolas Maduro na mesa, a kousa komentario krítiko.
“Ta manera ku awor Aruba, huntu ku Maduro, ta eksplotá e pais, miéntras ku e habitantenan ta sufri i muri pa kousa di e diktatura kruel aki. Awor nos ta kómplise?”, Elton Semeleer a reakshoná riba e imágen di e promé minister arubano na mesa ku e presidente venesolano Maduro. Di oro banda e habitantenan di e bario San Nicolas si a reakshoná kontentu. Ora e mandatarionan a regresá ei asta tabatin un fiesta chikí. Espesialmente simpatisantenan di e partido a hisa bandera na kas.
Krítika
Pero tabatin hopi krìtika tambe pasobra hopi tempu no tabata kla si ta berdaderamente a firma ku e kompania mama Citgo òf ku Citgo arubano, ku a lanta na yanüari. Ademas ainda e refineria ta den man di Valero. Minister di energia, Mike De Meza, ayera a aklará.
Sinku akuerdo
De Meza a splika ku a firma sinku akuerdo i ku ‘e bon Citgo’. Tambe a firma un deklarashon di intenshon pa investigashon tékniko-hurídiko di e konstrukshon di e pipa di gas entre e dos paisnan. I finalmente a firma un deklarashon tambe ku ta spesifiká e akuerdonan ku a sera anteriormente entre e minister di Asuntunan Eksterior di Hulanda ku Venezuela tokante un koperashon ekonómiko. “Ta trata di koperashon riba tereno di energia, por ehèmpel pa medio di interkambio di ayudo i ekspertisa.” Ademas e siman aki gobièrnu lo sigui ku e negosiashonnan ku Valero pa pasa e refineria.
Riesgo
E echo ku ekonomia di Venezuela ta bai masha malu mes e minister no a yama un riesgo èkstra grandi pa henter e operashon. “Nos por bai sinta pensa tur sorto di senario fatal. Pero porfin ta Citgo nos a firma e kòntrakt kuné. Nan mester kumpli ku nos kondishonnan.”
Derecho humano
Si derechonan humano a pèrdè ku e akuerdo di refineria na fabor di ekonomia promé minister Mike Eman a bisa ayera: “Mi ta kere ku lo a konsiderá mi iresponsabel mas lihé si mi a laga un kresementu di 15 porshento di nos GDP bai pasobra nos komo úniko den e mundu aki ke hasi un statement. Niun pais oksidental nunka no a tuma un posishon asina ainda. “
E kòntraktnan i e legislashon nesesario mester bai parlamento ainda pa aprobashon. Sin aprobashon, De Meza ta atmití, e kòntraktnan ku a firma djabièrnè ta imbálido. Pero gobièrnu no ta ferwagt esaki, komo ku tantu e frakshon di gobièrnu komo e oposishon a bisa kaba ku nan ta pro un re-apertura di e refineria.
Outor Sharina Henriquez