Sigur shen hende tabata presente na e ‘Vigilia pa Orlando’ | Potrèt: Dick Drayer
WILLEMSTAD – “E por sosodé aki tambe, ta un loko so mester tin. Pero Kòrsou ta tolerante kontra hende homoseksual, lesbiana, bi-seksual i transgender (LGBT). Nos ta haña hopi atheshon”, Frank Holtslag, manager di Floris Suite Hotel ta konta. Djabièrnè anochi sigur shen hende a bini e ‘Vigilia pa Orlando’.
Kasi sinkuenta hende a pèrdè nan bida siman pasá den un atake terorista riba e bar di homoseksual Pulse den e siudat merikano Orlando. 53 hende a keda heridá, algun di nan ainda ta lucha pa nan bida. Ta e tiroteo ku mas tantu morto na Estádos Unídos na man di un solo tiradó.
Skucha un reportahe di Dick Drayer (na Hulandes)
Ousente
No tabatin niun representante di iglesia katóliko na e vigilia. “A invitá obispu Luis Secco si, pero mi no a mir’é”, Mario Kleinmoedig di e movementu homoseksual FOKO ta bisa. Mohammed Khatib, presidente di Curaçao Moslim Society si tabata t’ei. Pero e organisashon a keda sorpresá ora ku na momentu ku a pidié dirigí palabra na e públiko el a bai. Den un reakshon Khatib a bisa ku no a anunsi’é den e apertura i ku lo tabata nèchi si esaki a sosodé. “Sigur si bo pensa ku ta un mòslem a kometé e akto teribel di terorismo aki.”
Kònsel general merikano Margareth Hawthorne | Potrèt: Dick Drayer
Gradisido
A invitá Margareth Hawthorne tambe. E Kònsel-general di Estádos Unídos a enfatisá ku tur hende LGBT ainda ta sufri di intoleransha i diskriminashon den su pais.
Pero, asina el a añadí: “Komo pais nos ta karakterisá mas tantu segun e manera ku e víktimanan a biba nan bida ku komo e odio di e hòmber ku a kita e bida aki for di nan.”Hawthorne ta gradisí komunidat kurasoleño ku – meskos ku na otro parti di mundu – aki na Kòrsou tambe a organisá un konmemorashon. “Esaki ke men masha hopi pa nos komo pais.”
Ounke Kòrsou, sigur den komunidat LGBT ta konosí komo gay-friendly, Kleinmoedig ta bisa ku e kultura ainda ta hopi negativo kontra esnan ku un ‘seksualidat diferente’. “Ta esaki nos mester atendé na Kòrsou, den misa tambe. Bo ta keda konta chiste di mariku? Bo ta keda prediká den misa ku bo no tin problema ku nan, pero ku Dios lo kastigá nan? E ora ei bo ta krea eksaktamente e tipo di frustrashon ku a yuda Omar Marteen, e tirado di Orlando, bira e mònster ku el a bira.”
Outor Dick Drayer