Ekónomo Rob van den Bergh | Potrèt: Dick Drayer
WILLEMSTAD – Ainda tin konfiansa den e sektor finansiero i e mundu di seguro na Kòrsou? Te awe esnan envolví no a kontestá e pregunta ei sufisientemente. Te ainda ta manera karnisero ta kùr su mes karni, ekónomo Rob van den Bergh di Curconsult ta haña. E ta reakshoná riba e publikashonnan di Het Financieele Dagblad i e kontestanan di esnan ku ta hunga den e merkado ei.
E korant Hulandes a skibi den un seri di artíkulo ku e seguradó di mas grandi di Antia Hulandes anterior, Ennia, su doño, e empresario Iranes-Merikano Hushang Ansari, a plum’é.
Ku transakshon di kua e plaka tabata resultá den su mes saku e lo a invertí 570 mion euro di su seguradó den su propio proyektonan. Banko Sentral a para mira segun Het Financieele Dagblad.
Garantia
“Si e problema ta ku e invershonnan ta serka un solo instansha i ku nan ta doño tambe di e mesun kompania di seguro, mester ta kla ku e invershonnan aki ta garantisá i ku nan no tin státùs abou” Van den Bergh ta bisa.
Hende ku tin un penshun ei, segun e ekónomo mester tin e siguransa ku nan no ta haña sla di e konsentrashon di invershon ei. “Ami lo ke bai asta un paso mas leu i pidi gobièrnu i Banko Sentral duna klarifikashon si por ehèmpel nan ke duna garantia, si e kos faya tòg.”
Klasifikashon di invershon
Van den Bergh ta bisa ku e ta puntra su mes tambe si e konsentrashon di invershon ta ‘common practice’. “Banko Sentral lo por indiká ku den nan direktivanan ta masha normal ku tin e tipo di konstrukshon asina, kaminda e doño ta usa plaka di su invershonnan pa finansiá su proyektonan.”
“Lo ta bon pa un agensia di rating duna e invershonnan konserní un rating. E ora ei pa Banko Sentral ta mas fásil pa sali i ku un státùs desente bisa ku tur kos ta eksaherá pòrnada”, Van den Bergh ta splika. Ademas e ekónomo ta ta pensa ku e asuntu no ta dje grave ei. “Pero tin daño di imágen si. E tipo di notisia aki mésora ta konosí serka e partisipantenan den mundu finansiero internashonal. I esei no ta bon. Pero por lo pronto mi no tin motibu pa duda e integridat di Banko Sentral. Pero lo ta bon pa investigá tur kos bon i splika e kosnan mas mihó.”
Rapòrt DNB
Van Den Bergh lo tin gana di mira e rapòrt ku Het Financieele Dagblad ta papia di dje. “Si hasi e kontenido públiko esaki lo por aklará e asuntunan lihé. Awor tòg ta palabra di e korant kontra palabra di Banko Sentral. Mi por imaginá mi ku un kantidat di hende kalifiká ta lesa e rapòrt, papia ku Ennia i Banko Sentral i despues informá esnan ku tin pólisa. Pasobra si esakinan baha bai e ora ei si nos tin un krísis di bèrdè mes.”
Outor Dick Drayer