Minister di Turismo Otmar Oduber – Foto: Ariën Rasmijn
ORANJESTAD — E conflicto entre minister di Turismo Otmar Oduber y e organisacion di hotelnan Ahata pa loke ta un ley nobo cu lo limita e cantidad di hotelnan all-inclusive na Aruba a yega na un climax awor cu Ahata no ta parti mas di e hunta di directiva di Aruba Tourism Authority (ATA).
Minister Oduber kier introduci un ley nobo cu den cual ta impedi hotelnan pa cambia pa un sistema all-inclusive of pa bende na operadornan cu ta uza e sistema aki. ATA ta sostene e idea aki. Aruba Hotel and Tourism Association, cu ta representa casi tur hotel na Aruba y cu segun legislacion semper mester tin tres miembro den e hunta di directiva di ATA, no ta di acuerdo cu e ley sinembargo. Durante ultimo simannan minister Oduber y Ahata a debati den sala di reunion y via avisonan den medionan local riba e topico aki. Djaweps e tres miembronan di Ahata den e hunta di directiva di ATA a entrega nan retiro.
Ahata
Oficialmente no tin ningun declaracion di parti di Ahata na unda ta duna un motibo pa esaki. James Hepple, director di Ahata a duna di conoce na Red Caribense cu e no por bisa nada pa motibo di un acuerdo di confidencialidad. ATA su directora Ronella Tjin Asjoe-Croes a declara ayera den un conferencia di prensa cu e motibo sigur no por ta pasobra lo tin mal maneho den ATA. Presidente di e hunta, Jossy Laclé a duna di conoce awemainta cu e tampoco sa pakico e tres miembronan representando Ahata a tuma nan decision.
E ta spera mescos cu Tjin Asjoe-Croes cu Ahata apunta candidatonan nobo pa e hunta. Partner di Red Caribense Noticia Cla sinembargo a publica djabièrnè cu, segun fuentenan cu kier a keda anonimo pa motibo di acuerdonan di confidencialidad, Ahata no ta nada contento cu maneho di ATA ultimamente. Entre otro, decisionnan lo a wordo tuma sin nan consulta. Awe mainta, minister Oduber no kier a reacciona riba esaki, bisando cu ta trata di fuentenan no confirma.
Eman ta sostene Oduber
Prome minister Mike Eman mientras tanto tambe a tuma su posicion den e conflicto aki. Durante un conferencia di prensa e mandatario a duna di conoce cu gobierno di Aruba ta sostene minister di Turismo y e ley nobo di all-inclusive. Segun e prome minister interes general di Aruba ta riba balansa akinan. Hotelnan all-inclusive na unda turistanan no ta sali for di e propiedad pa explora e resto di e isla no ta duna beneficio na tur esnan cu ta depende di e sector turistico.
Autor: Ariën Rasmijn