Ruman muhé mayó Lila i ruman muhé mas hóben Sherry ta pone un krans na graf di nan ruman hòmber Mitch Henriquez – potrèt: Sharina Henriquez
ORANJESTAD – Algun famia, entre nan dos ruman muhé di Mitch Henriquez, djárason a pone un krans na su graf. Na Aruba mes apénas tin interes pa nan kompatriota ku un aña pasá na Hulanda a pèrdè su bida na violensia di polis.
Tur tres e frakshonnan di parlamento arubano a disidí si pa manda un karta konhuntamente ku pregunta na e minister hulandes di Hustisia i Seguridat. Segun parlamentario Xiomara Ruiz Maduro ku tambe tabata serka e ponementu di krans, e pregunta mas importante den e karta ta: “Si famianan i komunidat arubano tambe por konta ku hustisia den e kaso aki.”
Investigashon
Otro siman ruman muhé Lila ta bai Hulanda, kaminda mama di Mitch t’ei kaba, pa tende mas di e investigashon di hustisia hulandes. E famia pa medio di nan abogado entretantu a tende tambe ku e investigashon ta kla i ku Ministerio Públiko promé ku fin di zomer lo disidí si e ta bai persiguí e sinku polisnan sospechoso.
Na e graf Lila ta lesa un deklarashon: “Komo famia nos lo ke mira mas pronto posibel ku lo bini hustisia. Esaki ta dura masha largu aworakí i e investigashon no ta tuma lugá públikamente. E último aki ta algu ku tin nos komo famia preokupá basta tempu kaba.”
Shòk
Tokante e atenshon skars na Aruba, kontrali na Hulanda kaminda djaluna mes a tene un demonstrashon, Lila Henriquez ta bisa: “Mi no por influenshá esaki. Tin asina tantu kos ku mi lo ke grita ku bos haltu. Pero ya, nos mester warda. I esei ta masha difísil pa nos.”
Maduro ta mira komo splikashon ku Aruba ainda ta den shòk. E ta bisa tambe ku ‘no ta den kultura arubano pa ta rabiá i ku tabatin atenshon espesialmente pa medio di orashon’. “Tantu pa e víktima ku pa e malhechornan.”
Outor Sharina Henriquez