Kathedraal van Pietermaai op Curacao. - Foto: Bisdom van Willemstad

Kathedraal van Pietermaai op Curacao. – Foto: Bisdom van Willemstad

ORANJESTAD – Abogado Benvinda De Sousa, na nomber di comunidad LGBT di Aruba, ta exigi disculpa di pastor Daniel Szpila pa expresionnan homofobico haci durante su ultimo sermon.

E casa di parlamentario Desiree De Sousa-Croes ta bisa cu si no bin un disculpa publico y sincero, lo bay entrega denuncia contra e pastor. Obispado di su banda ta bisa cu ta para tras di e esencia di loke Szpila a bisa, pero no tin un posicion firme riba e manera con e pastor a expresa su mes.

Ariën Rasmijn den combersacion cu Benvinda De Sousa y vocero di obispado, pastor Curtis Meris

Combersacion
Abogado Benvinda De Sousa a bishita obispado di Willemstad pa combersa cu entre otro monseñor Luis Secco ariba expresionnan homofobico haci dor di pastor Daniel Szpila di misa di Dakota na Aruba. Representando entre otro su casa Desiree De Sousa-Croes y Alfa, e organisacion local cu ta representa e comunidad LGBT na Aruba, e abogado a duna di conoce cu e kier mira un disculpa publico di parti di e pastor.

Si no haci esaki, lo bay haci denuncia contra pastor Szpila serca Ministerio Publico. Segun De Sousa no ta cuestion cu e ta pidi misa catolico pa ta di acuerdo cu casamento of registracion civil di personanan di mesun sexo. Es mas, e ta bay di acuerdo pa no ta di acuerdo. E ta bira un problema sinembargo ora e pastor uza palabranan ofensivo contra comuniddad LGBT, asina e abogado ta argumenta.

No tin posicion firme
Durante su sermon siman pasa, pastor Szpila lo a duna di conoce cu comunidad di Aruba lo ‘reta Dios’ si lo introduci matrimonio pa homosexual y cu parokianonaan mester pone presion riba politiconan pa no pasa ley cu lo facilita esaki.

Pastor Curtis Meris den su calidad di vocero di obispado, ta bisa cu pastor Szpila den su sermon a presenta e punto di bista di misa catolico. Obispado no tin posicion firme pa loke ta e forma con e pastor a expresa su mes, aunke cu hopi biaha e forma con algo wordo bisa ta wordo interpreta dor di un persona segun su mesun sintimentonan, a pesar cu e intencion lo por tabata diferente, segun pastor Meris.

Autor Ariën Rasmijn