Abogado Achim Henriquez ta papia ku habitantenan – potrètnan: Deya Mensche
WILLEMSTAD – Habitantenan rabiá di Drielstraat i Mari Pompoen a reuni huntu ku abogado Achim Henriquez awe mainta, ku e demandá pa Baoase kita e porta grandi ku resientemente a keda instalá i ku ta blòkia akseso na e playa públiko. Konosido pintor i ilustrado Garrick Marchena, kende ta biba den e kaya, a subi ritnan sosial pa ekspresá su indignashon riba e situashon ku tin basta aña andando.
Minister Suzy Camelia-Römer kende a hura di pone un paro na tur konstrukshon ilegal, ta na altura di e asuntu akí, i asta a pasa, mainta trempan, pa observa e situashon. Más despues, algun mandatario, habitante preokupá i varios piskadó a reuní pa eksigí di Baoase Luxury Resort pa kita e porta. Tambe dos funshonarionan di DROV tambe a bini na e sitio i a keda di traha un rapòrt di e suseso. Awe mainta Achim Henriquez, abogado di entre otro Marchena, a kontrolá e permitnan serka Kadaster unda ela konstatá ku e playa na final di Drielstraat en realidat ta tereno públiko i ku e blokeo di e kaminda i área ta un akto ilegal.
Siguientemente Henriquez a haña un yamada di Ad van der Valk, propietario i representante di Baoase, kende a splika ku e resort tin basta tempu ta yudando gobièrnu ku e mantenshon di e playa i kaminda ora di áwaseru i a insistí ku e porta ta riba nan tereno priva. Resientemente Baoase a kumpra e Atlantis Apartments i ta argumenta ku e tereno asina a keda atkerí dor di nan. Akí a surgi un diskushon entre Henriquez i van der Valk, unda e abogado a splika e hotelero ku esaki no ta e kaso según a papelnan di Kadaster, i a menasá di tuma pasonan legal si Baoase no kita e porta inmediatamente. Tambe Henriquez a invita van der Valk pa bin splika su punto na e habitantenan en persona, pero esaki a opta pa tur kòmbersashon bai via nan representantenan ofisial.
Garrick Marchena
Resolushon rápido
Tambe van der Valk a tuma kontakto telefóniko ku Marchena, pa splika un ke otro, pero esaki a referi’e bèk na Henriquez. Marchena a enfatisá ku su akshon ta algu ku tur habitante ku ta konfrontá ku un situashon similar lo hasi, i ku e ke pa bini un resolushon rápido. “Kosnan asina’ki ta inaseptabel, no por ta ku ta hasi kontrukshonnan ilegal, unda ta ekskluí lokalnan di usa espasio públiko. E situashon akí tin años ta andando”, Marchena a splika. “Mi no tin nada kontra di desaroyo, pero esaki tin di tuma lugá riba un manera legal i respetoso na habitantenan. Bo no por haña nos akinan i awó bo ke stroba nos” ela konkluí.
Tambe varios habitante indigna ku a indiká ku no ta e porta ku Baoase a pone resientemente ta e úniko konstrukshon ilegal. No muchu leu tambe tin algun konstrukshon di palu sospechoso, i tambe tin un porta di heru na kandal ku ta stroba piskadónan di haña akseso na e playa.
Porta
Banda di 12’or di mèrdia, bou di supervishon di e funshonario di DROV, finalmente Baoase a kita e porta i e habitantenan a keda satisfecho ku nan petishon a haña oido. Tambe Baoase a haña òrdu pa kita e porta di heru, pero te ainda esaki no a tuma lugá. Habitantenan a primintí di mobilisá pa asina garantisá ku e hotelero no ta bolbe pone e porta of impedí nan di otro manera akseso na nan playa tan gusta.
Porta di Heru ku mester keda kita
Outor Deya Mensche