Vigilansha na korte – potrèt: Janita Monna

Vigilansha na korte – potrèt: Janita Monna

KRALENDIJK – Tres bia 24 aña. Esei abogado-general Ton van der Schans a eksihí kontra Carlos Wanga, Gerson Cueto-Pacheco i Rayan Frans den e apelashon den e kaso Country Garden. E kaso tabata djaluna i djamars na Kralendijk. Segun Ministerio Públiko (OM) e tres hòmbernan ta envolví den e asesinato riba Thursten Scholts i Francis Lourens, kuminsamentu di 2014.

Pero despues di e último dianan aki den korte tambe a keda pregunta. Tokante ken den e anochi di 23 pa 24 yanüari a hunga eksaktamente kua papel, no tabatin klaridat.

Senario
Niun di e tres hòmbernan den e kaso aki nunka no a atmití nada. E sentensia di korte a sosodé a base di un senario ku na final a aseptá komo esun di mas probabel: e morto di Scholts i Lourens lo ta relatá ku droga. Cueto-Pacheco i Wanga lo a mata e dos hòmbernan segun òrdu di Frans.

Anteriormente wes no a konsiderá ku tin prueba pa asesinato premeditá i p’esei a sentensiá Wanga i Cueto-Pacheco na 24 aña pa motibu di homisidio. Frans a haña 16 aña pa provokashon di morto di Scholts.

Vishon di tùnel
Den e apelashon Frans tabatin asistensia di abogado Inez Weski. E di dos dia di korte el a ekspresá krítika fuerte riba e kalidat di e fail di su kliente. Den su defensa e abogado a bisa ku henter e kaso ta basá ‘riba santu gulidó’. El a avisá mustrando riba e kaso Spelonk, riba vishon di tùnel. Frans semper a keda para ariba ku di niun manera e no ta envolví den e asesinato dòbel. I segun Weski no tin sufisiente prueba legal i konvensedó pa sentensiá Frans.

Abogado Mounir Alam di Cueto-Pacheco tambe tabatin krítika riba e investigashon. El a papia di ‘deklarashon ku no a hasi den libertat’, asta di ‘método di gestapo’. Su kliente lo a topa Scholts pa papia tokante un asuntu di droga ku a disparsé. Segun su abogado e no tabatin niun parti den loke a sosodé despues e anochi ei.

Wanga tambe tabatin un parti den loke a sosodé e anochi ei, pero e no a mata Lourens i Scholtz, asina su abogado Ernst Wesselius ta bisa. Ta suponé ku Wanga lo a tira riba e dos víktimanan ku un arma di kandelá. Pero segun Wesselius seriamente mester duda e deklarashonnan di testigunan ku ta sostené esaki. “Tabata masha skur e anochi ei. E testigunan aki a tende tiru si, pero nan no a mira nada”.

Sentensia di e apelashon ta sigui riba 28 di yüli. Lo transmití e sentensia via videoconferencing for di Willemstad, pa asina e sospechosonan na Boneiru i Hulanda por siguié.

Outor Janita Monna