Ainda no ta kla kuantu refugiado Aruba por tuma – potrèt: Sharina Henriquez
ORANJESTAD – Gobièrnu a indiká dos sitio pa akohida di refugiado venesolano. No ta konosí unda nan ta keda i pa kuantu refugiado.
Gobièrnu arubano ta hasi misterioso tokante senario, plannan di emergensia i tambe sifra di ilegalnan venesolano. Ademas e instansianan di gobièrnu ta duna informashon kontradiktorio. For di 2005 segun e Ofisina di Kombatimentu di Desaster tin un plan di migrashon masal i entretantu tin un di tres vershon di e plan.
No ta kontestá pregunta tokante detaye pa por determiná kuantu refugiado Aruba por tuma. E Ofisina di Kombatimentu di Desaster ta bisa ku nan no sa pasobra nan ta trata solamente ku e plan i e ehekushon ta den man di diferente instansha di gobièrnu. “Pasobra Venezuela ta ‘hot’ aktualmente ta kere ku tur kos a kambia, pero no ta asina. Nò, nos no por bisa ken ta regla e akohida, sino e plan no ta sekreto mas.”
Senarionan nobo
Despues di a mira e plan sekreto, a bin sali ku a skohe 25 sitio di emergensia pa kalamidat. No ta menshoná e akohida pa refugiado venesolano spesífikamente.
Entretantu a traha senario nobo i a resultá ku polis ta hunga un papel grandi den e promé akohida. Fuentenan den polis ta splika pakiko: “Si nan yega den un estilo manera di Siria, nos sa esaki sigur mei ora delantá. I siudadanonan na tera lo avisá nos komo promé ora e botonan bini.”Despues e refugiadonan ta bai dos sitio di akohida designá.
Unda esakinan ta keda i kon grandi nan ta no ta kla. Ta minister di Hustisia so por duna e informashon aki, pero e ta inalkansabel.
Kontradiktorio
Banda di sekresia tin informashon kontradiktorio tambe. Asina e Ofisina di Kombatimentu di Desaster ta bisa ku no tin un taskforce spesial, miéntras ku despues ta sali ku e ta eksistí masha bon. E tin diferente instansha di gobièrnu aden maner Servisio di Seguridat pa mónitòr e riesgonan.
Tambe e Ofisina di Kombatimentu di Desaster ta bisa ku gobièrnu ta koperá ku NGOnan manera Krus Kòrá. Pero for di 2013 a sali den evaluashon di e plan di kalamidat ku esaki no ta reglá den práktika. Segun e direktor di Krus Kòrá Aruba, Michel La Haye, esaki ainda t’asina. “Nos no tin un akuerdo ku gobièrnu, ke men den e ramo ei tin espasio pa mehorashon.
Krus Kòrá tin espasio di akohida pa 150 hende kaminda 100 di nan mester keda den tènt. “Esaki ta e kapasidat máksimo ku nos por ofresé. E ora ei mester hasi palabrashon si pa nos por partisipá na e planeamentu i e ehersisionan, pa nos por sinkronisá bon pa e kos no bira un pániko.
‘No prepará’
E besindario di Baby Beach na San Nicolas ya pa añanan largu ta konosí pa e playanan kaminda e ilegalnan ta yega ku boto. Gerente Helen di e restorant kant’i laman Big Mama Grill ta bisa ku e ta mira mas venesolano drenta. “E refugiadonan ta drenta tur dia.” Erely Elisabeth ku tambe ta traha na e playa ta bisa: “Nan no ta bini asina masalmente den boto grandi pero nan ta bini si.”
Niun di dos no ta kere ku Aruba ta prepará pa un fluho di refugiado. Helen: “No tin lugá, apénas tin lugá pa nos mes. Ruba semper ta purba yuda. Ma bo no por saka dies man.”
Outor Sharina Henriquez