Catherine Mitchel den su sala. Ku ròlstul i protésis – potrèt: Dick Drayer
WILLEMSTAD – E urgensha ku SVB, banko di seguro sosial na Kòrsou, tin pa ekonomisá riba rekurso i revalidashon ta pasa su meta. Asina trahadó di protésis Tom de Wind i fisioterapista Marieke de Wind ta bisa. Huntu nan ta manehá e sentro di rehabilitashon Sentro Orto Físiko na Emmastad.
“E urgensha pa ekonomisá di SVB asta ta bai asina leu ku nan ta menasá di kita un ròlstul for di un pashènt ku a amputá pia, miéntras e tratamentu ta kore ainda”, De Wind ta bisa.
Amputashon
Un di e pashèntnan aki ta Catherine Mitchel. E ta pashènt di suku i for di dos luna e no tin su pia robés mas. Un komplikashon ku sa sosodé hopi kousá pa mal sirkulashon di sanger serka diabétiko. Na Kòrsou kada aña ta amputá pia serka kasi shen hende.
Catherine a haña djis un frakshon di e tratamentunan ku ta nesesario pa un revalidashon responsabel. Anto pa kolmo e mester a entregá su ròlstul tambe,pasobra e tratamentunan ku a asigná na dje a kaba.
Ròlstul
“Nan ke kita mi ròlstul”Catherine ta bisa. “Pero mi no ta kla ainda, mi no por hasi tur kos ku e protésis. Ainda mi no por sin ròlstul. Mi a bisa nan: bin mira anto, e ora ei bo ta mira ku mi no por sin dje.” Entretantu el a haña un prolongashon, pero e tin miedu ku aworó nan ta bini atrobe.
Trahadó di instrumento ortopédiko Tom de Wind ta tuma e urgensha pa ekonomisá na pechu. “Bo no por menasá hende den un posishon asina dependiente ku bo ta bai para e uso di rekurso.”
‘Téknika di retraso’
“SVB ta hasi masha difísil ora mester duna outorisashon. Tin di mi pashèntnan ku tin lunanan ta warda pa ahustá nan protésis. Mi tin e impreshon ku ta djis ekonomisá nan ta ekonomisá.”Su kasá, fisioterapista Marieke de Wind ta añadí: “Ta un sorto di téknika di retraso, un estilo poko poko ku ta hinka aden. Promé nos a kere ku ta e reorganisashon di for di 2013, pero awor nos ta kere ku simpelmente ta ekonomisashon. Anto miéntras ku e bùdjèt pa rekurso artifisial no ta ni un porshento di e bùdjèt total di salubridat.Ke men ta kiko bo ta ekonomisá anto riba lomba di e pashèntnan?”
Lisette Cova no ta rekonosé su mes den e relato di e trahadó di instrumento i e fisioterapista. E ta manager di kuido na SVB. “Nos no ta ekonomisando niun ora, nos no ta kita ròlstul for di hende. Nos a kaba e lista di hende ku ta warda rekurso. Pero nos a bira mas estrikto si, esei ta klòp. Nos a hasi e maneho mas skèrpi. Ta SVB su tarea pa usa e medidanan ku nos tin mas efektivamente posibel.”
Kòntròl
I den esaki awor ta buska un balansa segun Cova. “Esei ta enserá ku nos lo kontrolá mas tantu. No ta tur hende gusta esaki. Pero nos mester, sa hasi hopi mal uso di nos previshonnan.”
Outor Dick Drayer