Dies aña largu Rutsel Chatlein tabata riba kaya. E akohida su tras riba e potrèt a kambia esaki – potrèt: Elisa Koek
WILLEMSTAD – E akohida di anochi na Punda di Fundashon pa Maneho di Adikshon (FMA) despues di diessinku aña a sera. Chòlernan ta bonbiní ainda den dia, pero mitar di sinku di atardi e porta ta sera i nan ta riba kaya atrobe. “E ora ei nan ta bai dualu i molestiá hende den café”, segun Rutsel Chatlein ku añanan largu a biba riba kaya i ku awor, den su mes palabranan, danki na e akohida ta ‘bek den bida nòrmal atrobe’.
Meta Fahrenfort, general manager di FMA ta di akuerdo kuné. E lo a preferá di tene e akohida habrí, pero a para e trayekto di siña i traha i e dies trahadónan ku tabata traha den e akohida di anochi, a bai di un dia pa otro.
Rutsel ta un persona konosí den Punda. Miéntras ku e ta kana di biblioteka pa e akohida di FMA su tras, kada un par di meter e ta kumindá un hende. Mayoria di e hendenan ku e ta papia kuné tin paña kibrá, kabei sushi i un mirada bruá. “Nan no a logra ainda”, Rutsel ta bisa. “Pero nan lo yega. Mi tambe tabata asina, pero ami i tur hende ku e tempu ei mi tabata den FMA kuné ta den bida normal atrobe.”
Konstruí un ritmo
Dies aña largu Rutsel tabata riba kaya. Tabata skòp e, dal e, ridikulis’é i e tabata hasi tur kos pa e por huma droga. Espesialmente e anochinan tabata difísil: sin bon kaminda pa drumi e tabata dualu riba kaya i den dia e tabata mas morto ku bibu. E akohida di anochi a kambia esaki. “Bo mester tabata paden promé ku shet’or djanochi i natural nos tabata tei. Nos por a drumi i haña un ritmo normal, mi bida a haña struktura i mi no tabatin mester di e humamentu mas. Aktualmente mi tin mi mes kas dos aña kaba, pero ainda mi ta drumi for di och’or.”
Kiebro
E akohida ku Rutsel ta gaba asina tantu a sera. Hende sin kas por bini bei un poko den dia, pero anochi si a kaba. Mari Jansen di Skalo a ripará mes ora. “Tres kiebro den e último dos lunanan” e ta konta. Tòg e no tin miedu. “Ta kuminda so nan ta hòrta. Ta p’esei mi sa ku ta chòler. Awor mi ta laga algu pa nan dilanti porta i mi ta spera ku mi no tin nodi di kumpra un kandal nobo.”
No ignorá
Raygen Zuiverloon di Downtown Management Organization ta hartá di e seramentu. E tin añanan ta traha pa hasi Punda bibu i seif i esaki no ta yuda. “Sentro di Punda ta un produkto ku por generá plaka. Kada siudat tin su vagabundonan, pero mester tin un lugá pa nan i esei tabatin na FMA.” E no ta ripará ku e hendenan di anochi ta stroba seguridat, pero e ta realisá ku por ta fèrfelu pa turista. “Nunka no ta agradabel pa pidi limosna ta p’esei mester yuda e hendenan aki ku programanan. Esei ta sosodé den tur siudat grandi. Nos no por lubidá nan i hasi manera e problema no ta eksistí.
Fahrenfort di FMA a aserká Curçao Tourist Board pa ayudo i a trata di haña solushon serka Ministerio di Asuntunan Sosial, sin resultado. E ministerio ta haña ku e hendenan ta siña muchu poko den e akohida di anochi. Ademas no tin lugá den FMA pa un karera mas aleu. Esaki ta enserá ku e seramentu ta permanente.”Mi no por komprondé, pasobra e akohida ta masha importante. Lástimamente nos no por yuda. Nos ta lucha kaba ku un bùdjèt muchu pèrtá ke men nos no por paga dies trahadó èkstra.”
Outor Elisa Koek