Frans van Efferink, direktor di SGB – potrèt: Janita Monna
KRALENDIJK – E direktor di Scholengemeenschap Bonaire, Frans van Efferink, ta satisfecho ku sigur 73 porshento di e alumnonan a slag e aña aki pa nan èksamen final. Ta mas ku aña pasá. Tòg mésora Van Efferink ta bisa: “Porsentahe di slagmentu no ta nifiká tur kos.”
E mes mester kustumá ku e sifra aki. “Na Hulanda kasi semper ta 90 pa 100 porshento di e alumnonan ta slag. Pero na Boneiru ta trata di kantidatnan asina chikí, ku e porsentahenan ta deformá lihé. Mi ta preferá di bisa ku di e 47 kandidatonan di èksamen final di havo, 31 a slag. I den un di tres temporada algun di nan por haña un di dos chèns pa logra algu.”
Tambe Van Efferink, ku na kuminsamentu di aprel a sigui Lydia Emerencia komo direktor general di SGB, ta haña ku tin muchu énfasis riba e resultadonan di èksamen.
Hopi preshon
Lo e ker a mira ku tin un kambio den e pensamentu tokante enseñansa. “Ta manera aki ta duna mas balor na un diploma di havo òf vwo, ku na un diploma di vmbo. Esei ta pone ku tin bia tin hopi preshon pa laga un mucha sigui un nivel mas ‘haltu’ posibel di enseñansa. Pero esei ta un diskushon robes. Loke ta relevante ta : ki tipo di enseñansa ta kuadra mas mihó ku e alumno? Un mucha ku na mavo ta haña ocho ku nuebe, na havo kisas por haña nèt sinku i seis. E pregunta ta: kiko lo yud’é mas mihó ora e bira grandi? E preferensha straño aki pa kognishon, tin bia lo krea mucha infelis.”
E porsentahe ku a slag kisas a oumentá, espesialmente kompará ku 2014 ora ku e sifra abou di e kantidat ku a slag asta a kousa pregunta den Tweede Kamer, ‘pero un sifra asina ta influenshá pa hopi faktor, Van Efferink ta bisa: “Pa menta unu: kiko ta e efekto di dosente ku ta bai kada tres aña? Na skolnan na Hulanda nunka mi no a topa esaki asina tantu. Tòg, mi por imaginá mi ku esaki por hasi e alumnonan insigur, si nèt esun dosente ku bo tabata asina kontentu kuné, no tei mas e próksimo aña di skol.”
P’esei e ke trata mas tantu pa mantené dosente ku ta biba na Boneiru, sea ku nan ta bonerianu, Yu di Kòrsou, arubano, hulandes òf surinameño.
Kalor
“Mi ke trata esaki pa medio di trese mas ‘kalor’den skol. Mester ta agradabel pa traha aki. I enseñansa ta agradabel si bo traha huntu. Esei ta un paso ku SGB por bien hasi. Si tin mas alegria den skol, bo ta haña mihó resultado. Mi ta konvensé di esaki.”
Banda di esaki Van Efferink ta pro integrashon di teknologia den enseñansa, no komo remplaso di esaki, pero komo adishon riba e dosente i e buki di lès. “Aktualmente nos ta hasi un pilot: e alumnonan di dos klas den vmbo a haña un laptop. Esaki ta duna e dosentenan e posibilidat pa diferenshá mas den lès.”
Tin mas kambio planeá. Asina despues di fakansi grandi na vmbo lo introdusí e ‘Vakcollege’. Ei e alumnonan ta skohe un direkshon mésora. Téknika, kuido, atministrashon. I tambe mésora den e promé aña nan ta haña dies ora di lès di práktika.
Komunidat kompleho
Resultado ta importante, Van Efferink ta haña, pero un skol t’ei tambe ‘pa siña mucha hiba un bida den un komunidat basta kompliká’. Na final lo el a preferá di haña un evaluashon di e klima pedagógiko di e skol, i di e seguridat den e skol. “I ku e alumnonan lo bisa: “O, e enseñansa aki ta masha agradabel mes.”
Outor Janita Monna