Suzy Camelia-Römer ta kombersá ku habitantenan – potrèt: Deya Mensche
WILLEMSTAD – Ayera nochi, minister Suzanne Camelia-Römer tabatin un enkuentro ku habitantenan di Boka Simón i Mari Pompoen, unda ela presenta e plan di desaroyo di e kosta i playanan di Kòrsou, kuminsando na e bahia di Piscadera te ku Bapor Kibra. E enkuentro tabata bon bishitá i e públiko presente a hasi varios pregunta skèrpi na e minister di Tráfiko, Transporte i Planifikashon Urbano i demas representante di DROV i Domeinbeheer.
Durante su diskurso, minister Camelia–Römer a splika su vishon di maneho, unda ela enfatisá den un rima ku mester kita man for di nos tera i hala leu fo’i nos awanan. “Mi filosofia ta, un tremendo Kòrsou pa biba i un tremendo Kòrsou pa bishitá, unda e karákter úniko di kada bario mester keda preservá”, e minister a splika. Na Ougùstùs lo kontinuá e trabounan na Piscadera te Punda i ya e fondonan a keda hasi disponibel. Akí lo keda kreá un bulevar ku ta inkluí Koredor, pero lo tin un interupshon na Holiday Beach pa un parke edukativo na e bahia di mangel di awa. Tambe minister Camelia – Römer a splika ku lo desaroyá Marichi komo un bich públiko den Punda, despues di a kreá un kibradó di awa komo protekshon.
Akseso total
Loke ta trata e área di Boka Simón te Baoase, gobièrnu a desaroyá un konsepto di un plan, unda den su vershon final, lo inkorporá tur sugerensianan i deseonan di e habitantenan. Akí tambe lo traha un koredor bon ilumina unda habitantenan ta keda ku akseso total na e kosta.
Tambe minister Camelia – Römer a trata e situashon na Pietermaai, unda ela splika ku gobièrnu ta hasiendo un estudio i pronto lo presenta esaki na prensa i públiko. Según minister Camelia – Römer, e paseonan ku aktualmente ta sera, a keda identifiká i ku esaki lo keda habri pronto. E plan final di e minister ta pa tin un kosta habri pa públiko manera nos hermana islanan St. Maarten i Aruba, unda e pueblo por rekreá i e turista ta bon bini.
Plan
Despues di e diskurso di minister i e presentashon di DROV, habitantenan a entrega e minister un buki unda a kompilá e deseonan ku muchanan di bario tin ku e área. Tambe diferente habitante presente a hasi pregunta na e panel. Entre otro a puntra minister Camelia–Römer dikon no a trata den e plan e área di Ala Canoa, ku ta entre Avila Beach Hotel i Boka Simón. Riba esaki e minister a kontesta ku ta ehekutá e plan den etapa i ku e área ei tambe lo haña su debida atenshon.
Tambe a puntra minister kiko ta bai pasa kue dèmpelmentu ku Baoase supuestamente a hasi ilegalmente i e herunan ku ela pone den awa pa traha un pir, kual según habitantenan, ta formando un peliger pa e hendenan ku ke usa e playa. Riba esaki, Camelia – Römer kontesta ku Domeinbeheer ta hasiendo un investigashon riba e asuntu akí i lo tuma e medidanan necesario ora e tin mas informashon konkreto.
Krítika
Camelia–Römer a splika ku no ta asina sina ta basha konstrukshon abou, pero ku mester analisá kada situashon individualmente, paso e ta haña hopi krítika di e komunidat. “Antes gobièrnu tabatin un maneho di toleransia ku ami no ta para su tras, i ku tabata legalisá e konstrukshonnan fásilmente”, e minister a splika. Tambe Abogado Achim Henriquez, kende ta representante di diferente habitante indigna di e bario, a puntra minister si e lo adresa e otorgamentu di permiso dubioso na varios desaroyadó di propiedat.
Riba esaki, minister a indiká ku nunka ela haña un keho ofisial riba komportashon di un funshonario den su departamentu, i ku tipo di akusashon asina mester keda hibá na porkuror general pa investigashon. “Ami sigur lo sostené esaki i lo kana e kaminda pa saka tur apel putri for di e aparato”, e minister a finalisá.
Outor Deya Mensche