Partisipantenan di e gira ta impreshoná ora den e úniko sèl di morto ku a konservá nan lesa inskripshon di speransa i desesperashon di Segundo Guera Mundial – potrèt: John Samson
DEN HAAG – Ku hopi interes a tene e promé kaminata pasando lugánan históriko kaminda antiano i surinameño a hunga un papel durante Segundo Guera Mundial.
E gira di Pasado Presente ta kuminsá na e monumento nobo di George Maduro na Madurodam. A lanta e siudat miniatura pa tene e memorianan na e héroe di guera kurasoleño bibu, pero poko hende konosé e historia ei kaba. Tin hopi mas héroe di guera karibense. I nan historia tampoko no a haña hopi atenshon, asina investigadó i historiadó dr.Valika Smeulders ta bisa. Ta p’esei riba su mes inisiativa e ta organisá kaminata den Den Haag.
E eskoho pa konmemorá héroe blanku so, segun e historiadó lo ta un di e motibunan di mas grandi pakiko tin asina tiki konosementu di e papel ku antiano i surinameño a hunga. Durante di e promé kaminata Smeulders ta kana pasa diferente sitio históriko, ku lo no hala atenshon di kualke paseante. E ta mustra algun potrèt i ta distinguí un detaye doloroso: e tempu ei kasi nunka no a saka potrèt kaminda por mira ‘hende di koló’. Na Paris esaki tabata un strategia konsiente.
Durante e okupashon aleman ta algun mil antiano i surinameño so tabata biba na Hulanda. Bou di e partisipantenan durante di e gira ta surgi e noshon ku durante Segundo Guera Mundial a papia papiamentu na Hulanda. “Esaki di repente a pone mi eksperensia kambia, tòg ta bo idioma materno”, un dama kurasoleño ta bisa poko poko.
Dr. Valika Smeulders ta investigadó spesialisá den diversidat den komunidat, herensia i pasado di sklabitut – potrèt: John Samson
Na Oranjehotel, e apodo di e prizòn ku nazinan tabata usa, diferente di Smeulders su historianan ta yega mas serka. E ta para dilanti un porta chikí di heru di e muraya di prizòn, e “door-of-no-return’, ku pa rèspèt ta será. Es ku alemannan pasa via e porta aki, djis despues ta ehekut’é. E héroe di resistensia arubano Boy Ecury mester a pasa via e porta aki. Paden un grupo di binti hende, masha impreshoná ta mira e úniko sèl di morto ku a konservá.
Mas atenshon
Último lunanan na Hulanda a tene un kantidat remarkabel di aktividat pa konmemora héroe di guera karibense. Por ehèmpel e reunion di konmemorashon bon bishitá di OCaN na mei, e dunamentu di e kondekorashon Militaire Willemsorde i e kambionan grandi na Madurodam. Literatura tambe a konosé un ekspanshon: un buki yen di dato nobo di Segundo Guera Mundial, un biografia di George Maduro i un buki di prenchi.
Outor John Samson