Pink Pony Express ta kanta himno di Madurodam – potrèt: Pieter Hofmann
AMSTERDAM – Cecilia Hendrikx di e kolektivo di arte Pink PonyEspress ta haña Madurodam e okashon perfekto pa mustra henter Reino. “Pasobra kada mucha hulandes sa bai einan un bia. Si e ora ei e mira algu di Kòrsou òf Statia, tòg e ta haña un otro imágen ku esun di un banda so manera aworaki.”
Na e festival di Kwaku awe a papia di Reino. E énfasis tabata riba e formashon di imágen di un banda so i e falta di konosementu di Reino. Un kaso ehemplar tabata kon e parke miniatura Madurodam ta reflehá Reino. Entre otro periodista, artista i trahadó di maneho a partisipá na e programa.
Madurodam ta un inisiativa di e mayornan di e héroe di resistensia George Maduro. Na 1073 un maketa di Willemstad a aparesé den e parke. Na 1991 e sentro di Willemstad a disparsé atrobe.
Sint Eustatius
Na 2012 Pink Pony Express a biaha bai Statia. Ei nan a hasi un proyekto ku mucha di skol básiko, ku a kopia edifisio lokal na un eskala di 1:25. A skohe Fort Oranje komo e edifisio di mas popular. Ta di mira ainda si un dia berdaderamente e lo resultá den Madurodam.
For di algun aña e kolektivo di arte ta negoshá ku Madurodam. E parke ta bisa ku e no tin indikashon ku berdaderamente tin nesesidat di edifisio antiano na miniatura. “Nan ta keda ketu”, ‘Pony temporario’ Jesper Buursink ta bisa.
Poko interes
Madurodam ta ilustrativo pa un problema mas amplio: un falta di interes hulandes pa Reino. Ron van Veer, presidente di e Komishon Relashonnan den Reino: “Masha hopi hende no sa ku Koninklijke Reddingsmaatschappij tin 30 aña kaba ta koperá ku Citro, òf ku Rijksuniversiteit ya tin 25 aña ta manda ko-asistente pa SEHOS. Pero tur hende ta probechá.”
No tin amor pa Reino pasobra e ta kompletamente deskonosí. Den enseñansa apénas tin atenshon pa historia di Reino, di kua por ehèmpel sklabitut ta forma parti”, Van der Veer ta haña. Mas wespet ta sostené su punto.
Konosementu
Entretantu ta palabrá ku minister Jet Bussemaker pa inkorporá konosementu di Reino tambe. Van der Veer: “Na Portugal alumnonan ku pasa èksamen final sa tur kos di Azores, na Fransia nan sa tur kos di Martinique i Guadeloupe. Mester inkorporá esaki tambe den èksamen, sino e ta muchu opshonal.”
Outor Pieter Hofmann