Participantenan den Plastic Beach Party debatiendo riba concepto. Foto: Ariën Rasmijn
ORANJESTAD — Plastic Beach Party ta un iniciativa den cual ciudadanonan ta traha nan mesun sistema di reciclahe di plastic na Aruba, construyendo machinnan cu lo procesa desperdicio di plastic y traha productonan nobo di dje pa diferente sector den comunidad.
Co-iniciadora di e proyecto Christie Mettes ta mustra riba indicacion cu Aruba ta importa 5000 ton di plastic anualmente, cual ta e di dos cantidad mas halto den Caribe. Hopi di e plastic aki ta bay dump na Parkietenbos y consecuentemente ta drenta lama. Colectando e plastic aki pa kibre na pida chikito y trahando productonan nobo di dje cu por wordo uza den diferente sector, por percura pa menos plastic yega dump, segun Mettes.
Ariën Rasmijn den combersacion cu Christie Mettes
E proyecto aki ta awo den e fase den cual un grupo di ciudadano ta trahando riba cinco concepto, na unda lo bay recicla plastic y comberti esaki den productonan sostenibel cu uzo specifico den sectornan di agricultura, naturalesa, educacion, turismo y construccion. Esaki nan ta haciendo bou guia di e diseñador Lewis Just, cu a bin Aruba specialmente pa e proyecto aki. Cada sector lo bay haya nan mesun proyecto. Un idea cu tin por ehempel pa sector di naturalesa ta pa produci trampanan pa boa.
Pa educacion a propone entre otro pa bin cu un sistema di recicla coy hunga. Unabes cu a scohe – uzando input di representantenan di e sectornan – cua proyectonan lo bay wordo ehecuta, lo bay produci y mercadea e productonan. Pero pa por yega na e punto aki, mester construi cuater machin y un forno cu cual e grupo aki mes lo por comberti plastic den productonan. Pa yega na e fondonan pa por construi e machinnan, Plastic Beach Party ta buscando donacion ainda. Segun ambos Mettes y Just, e proyectonan aki lo por forma un base pa asina crea interes den reciclahe.
Autor Ariën Rasmijn